रायगड - मुंबई-गोवा महामार्गावर पेण तालुक्यातील बळवली फाट्याजवळ खड्ड्यामुळे मोटार सायकलला अपघात होऊन १ जण जागीच ठार झाला आहे. आज सकाळी साडेआठ वाजण्याच्या सुमारासही घडली. मृत तरुण नवी मुंबईतील रहिवासी आहे. या अपघातामुळे पुन्हा एकदा महामार्गाच्या खड्डेमय रस्त्याचा प्रश्न ऐरणीवर आला आहे.
नवी मुंबई येथील २ तरुण सकाळी मुंबई-गोवा महामार्गावरुन (एमएच ४३/ एइ ९४५८) या होंडा मोटार सायकलवरुन नवी मुंबईकडे निघाले होते. मोटार सायकल बळवली फाट्याजवळ हनुमान मंदिराजवळ आली असता महामार्गावर पडलेल्या खड्ड्यांमुळे मोटार सायकल चालकाचा तोल गेला. यानंतर दोन्ही तरुण खाली पडले. या अपघातात एका तरुणाच्या डोक्याला जबरी मार लागल्याने तो जागीच ठार झाला. अपघातानंतर पेण पोलीस घटनास्थळी येऊन अपघातग्रस्त तरुणाचा मृतदेह पेण उपजिल्हा रुग्णालयात शवविच्छेदनासाठी पाठविला. या अपघातामुळे काही काळ मुंबई गोवा महामार्गाची वाहतूक ठप्प झाली होती.
