रायगड - उमेदवारी अर्ज दाखल करण्याचा आजचा (३ ऑक्टोबर) आणि (४ ऑक्टोबर) हे दोनच दिवस शिल्लक राहिले आहेत. उमेदवारांनी आजचा मुहुर्त गाठत अर्ज भरण्यासाठी गर्दी केली. उरण विधानसभा मतदारसंघातून शेकापतर्फे माजी आमदार विवेक पाटील यांनी चक्क बैलगाडीतून जात उमेदवारी अर्ज दाखल केला.
राज्यात सध्या विधानसभा निवडणुकीचे वातावरण तापले आहे. अर्ज भरण्यास देखील सुरूवात झाली आहे. कुणी अर्ज भरण्यासाठी हजारोंची गर्दी घेऊन जात आहेत. तर कोणी हटके स्टाईल अवलंबताना दिसून येत आहेत. शेतकऱ्यांचे, कामगारांचे आणि बहुजनांचे राज्य आणण्याच्या स्वप्नातून शेकापची सुरुवात झाली. शेतकरी चळवळ पहिल्यासारखी आणखी मजबूत करण्यासाठी विवेक पाटील हे उरण मतदारसंघातून विधानसभेच्या मैदानात उतरले आहेत.
हेही वाचा - भाजपचा एकनाथ खडसेंना ठेंगा, मात्र मुलगी रोहिणी खडसेला मिळणार उमेदवारी..?
हेही वाचा - अखेर नितेश राणेंच्या हाती 'कमळ', काँग्रेसचा सोडला हात
मागील काही दिवसांपासून आजारपणामुळे विवेक पाटील हे राजकारणापासून दूर होते. २०१४ ची लढत ही अटीतटीची झाली होती. त्या निवडणुकीत शिवसेनेचे उमेदवार विद्यमान आमदार मनोहर भोईर यांनी विवेक पाटील यांचा अवघ्या ८४६ मतांनी पराभव केला होता. त्यामुळे यंदाची विधानसभा निवडणुक ही शेकापच्या अस्तित्वाची लढाई असणार, हे मात्र नक्की.
