रायगड - वासांबे मोहोपाडा ग्रामपंचायतीवर शिवनगरवाडी, शिंदीवाडी, तळेगाववाडी, पानशिलवाडी तसेच श्रमजीवी संघटनांच्या सहकार्याने आदिवासी बांधवांनी मोर्चा काढून विविध मागण्या केल्या.
आदिवासी बांधवांनी वाचला समस्यांचा पाढा
श्रमजीवी संघटनेच्या सहकार्याने वासांबे मोहोपाडा ग्रामपंचायत हद्दीतील आदिवासी बांधवांनी गुरुवारी (10 जून) मोर्चा काढला. तसेच, वासांबे मोहोपाडा ग्रामपंचायतीबाहेर घोषणाबाजी केली. यावेळी ग्रामपंचायत कार्यालयात मोजक्याच आदिवासी बांधवांना घेऊन चर्चा करण्यात आली. यावेळी आदिवासी बांधवांनी समस्यांचा पाढाच वाचला. खावटी अनुदान योजना 2020 शासन निर्णंयाची अंमलबजावणी करुन 2 हजार रुपयांच्या जिवनावश्यक वस्तू आदिवासी लाभार्थ्यांना न मिळणे, मंजूर लाभार्थ्यांना बॅंक खात्यावर जमा न झालेले 2 हजार रुपये जमा होण्यास का विलंब? असे प्रश्न उपस्थित करण्यात आले. याप्रसंगी ग्रामविकास अधिकारी व ग्रामपंचायत कमिटीने समाधानकारक उत्तर देवून आदिवासी बांधवांना शिल्लक अनुदान एक महिन्याच्या आत जमा होईल, असे आश्वासन दिले.
'आदिवासी बांधवांना त्यांचा हक्क द्यायलाच पाहिजे'
तर, शिवनगरवाडी, शिंदीवाडी तळेगाववाडी यांच्या पाणी समस्या, घरकुल योजना तसेच रस्ता आदी समस्या सोडविण्याची मागणी यावेळी आदिवासी बांधवांनी केली. यावेळी आदीवासी बांधवांच्या बाजूने स्वच्छता कमिटी अध्यक्ष अरुण गायकवाड यांनीही आदिवासी बांधवांना त्यांचा हक्क द्यायलाच पाहिजे, अशी मागणी केली.
मागण्या मान्य न झाल्यास आंदोलनाचा इशारा
ग्रामपंचायत कार्यालयाबाहेर आदिवासी महिलांनी घोषणाबाजी केली. तसेच, मागण्या मान्य न झाल्यास उपोषण करण्याचा इशाराही दिला. यावेळी ग्रामपंचायत सरपंच ताई पवार, उपसरपंच राकेश खारकर, ग्रामविकास अधिकारी सुधीर तोंडलेकर, माजी सरपंच संदिप मुंढे, माजी सरपंच कृष्णा पारंगे, संतोष मैदर्गींकर, स्वच्छता कमिटी अध्यक्ष अरुण गायकवाड, बाबू वाघमारे, भिम पवार, सुरेखा पवार, अशोक पवार, अनंता वाघे आदी उपस्थित होते.
हेही वाचा - राजकीय रणनीतीकार प्रशांत किशोर सिल्वर ओकवर दाखल; शरद पवारांसोबत चर्चा सुरु
