रायगड - पतीच्या त्रासाला कंटाळून आत्महत्या करण्यासाठी इमारतीच्या छतावर चढलेल्या महिलेला वाहतूक पोलिसांनी शिताफीने वाचविल्याची घटना काल गुरुवारी सायंकाळी माणगाव येथे घडली. विशाल येलवे आणि योगेश मदने असे या वाहतूक पोलिसांचे नाव आहे. दरम्यान, या पोलीस कर्मचाऱ्यांचे सर्व स्तरातून अभिनंदन केले जात आहे.
माणगाव रेल्वे स्थानकासमोर एका पाच मजली इमारतीचे बांधकाम सुरू आहे. दरम्यान, गुरुवारी सायंकाळी साडेसहाच्या सुमारास या इमारतीच्या पाचव्या मजल्यावर एक महिला आत्महत्या करण्याच्या उद्देशाने उभी असल्याची माहिती विशाल येलवे यांना फोनद्वारे कळली. यानंतर विशाल येलवे यांनी तातडीने आपले सहकारी योगेश मदने यांना सोबत घेऊन घटनास्थळ गाठले. यावेळी नागरिकांची गर्दी इमारतीच्या खाली जमा झालेली होती. यानंतर विशाल येलवे यांनी महिलेस 'तुम्ही आत्महत्या करू नका, मी तुमची काही अडचण असल्यास मी ती भाऊ म्हणून सोडवतो' असे म्हणत बोलण्यात गुंतवले. दरम्यान, योगेश मदने यांनी इमारतीवर जाऊन महिलेला खेचून खाली आणल्याची माहिती आहे.
हेही वाचा - माझ्याकडील पुराव्यात शरद पवार यांचे नाव नव्हेच - अण्णा हजारे
मिळालेल्या माहिती नुसार, ही महिला माणगाव शहरातील रहिवाशी असून तिचे पती बाबासाहेब आंबेडकर तंत्रनिकेतन महाविद्यालयात नोकरी करतात. दरम्यान, महिलेचा मागील आठ वर्षांपासून तिचे पती छळ करतात. तसेच तिच्या शरीरात कुठली तरी मशीन देखील बसवलेली आहे. दरम्यान, पतीच्या छळाला कंटाळून ही महिला आत्महत्या करणार होती. मात्र, मुलीच्या भविष्याचा विचार मनात आल्याने हिम्मत झाली नसल्याची माहिती महिलेने दिली आहे. महिलेला सुखरूप वाचविल्यानंतर वाहतूक पोलिसांनी तीला माणगाव पोलिसांच्या ताब्यात दिले आले. यावेळी महिलेचा पती देखील घटनास्थळी पोलिसांसोबत दाखल झालेला होता. दरम्यान, माणगाव पोलीस पुढील कारवाई करीत आहेत.
हेही वाचा - पवारांच्या खांद्यावर बंदूक ठेवून शिवसेनेने साधला 'निशाणा'
