रायगड- मुंबई, ठाण्यासह, कोकण तसेच जिल्ह्यात गणेशोत्सव सण मोठ्या उत्साहात साजरा केल्या जातो. येत्या २ सप्टेंबरपासून या उत्सवाला सुरूवात होणार आहे. त्यामुळे चाकरमान्यांची कोकणात जाण्यासाठी लगबग सुरू झाली आहे. परिणामी जिल्हा पोलीस व वाहतूक पोलीस दलाकडून २८ ऑगस्टपासून रायगड हद्दीतील मुंबई गोवा महामार्गावर चोख वाहतूक बंदोबस्त करण्यात येणार आहे. त्यानुसार मुंबई-गोवा महामार्गावर १४ ठिकाणी सीसीटीव्ही लावण्यात आले आहेत.
मुंबई-गोवा राष्ट्रीय महामार्ग क्रमांक ६६ तसेच पालीफाटा (खोपोली) वाकण राष्ट्रीय महामार्ग क्रमांक ५४८ (ए) वरुन मुंबई, नवी मुंबई, ठाणे, पालघर, कल्याण, पुणे ईत्यादी ठिकाणाहून रायगड, सिंधुदुर्ग,रत्नागिरी येथे गणेशोत्सवानिमित्त कोकणवासीय आपल्या गावी जातात. त्यामुळे गणेशभक्तांचा प्रवास सुखकर व्हावा, वाहतुकीचे नियमन व नियंत्रण सुलभ व्हावे, म्हणून रायगड जिल्हा पोलीस दलामार्फत वाहतूक बंदोबस्ताची नियोजनबध्द आखणी करण्यात आली आहे. अशी माहिती जिल्हा वाहतूक शाखेचे पोलीस निरीक्षक सुरेश वराडे यांनी दिली.
रायगड जिल्हा पोलीस अधीक्षक अनिल पारस्कर व अपर पोलीस अधीक्षक सचिन गुंजाळ यांच्या मार्गदर्शनाखाली ६ उपविभागीय पोलीस अधिकारी, १३ पोलीस निरीक्षक, २० सह.पोलीस निरीक्षक/पोलीस उपनिरीक्षक, ३८४ पोलीस कर्मचारी यांची नेमणूक करण्यात आली आहे. त्याचबरोबर, महामार्गावर १० वाहतूक मदत केंद्रांवर क्रेन, अॅम्ब्युलन्स तयार ठेवण्यात येणार आहेत. एखादे वाहन नादुरुस्त झाल्यास ते वाहने तात्काळ बाजूला करुन वाहतूक सुरळीत ठेवली जाणार आहे. तसेच महत्वाच्या गर्दीच्या ठिकाणी बॅरीकेटींग करण्यात आली असून गणेशभक्तांचा मार्ग सुकर व्हावा म्हणून ठिकठीकाणी दिशादर्शक फलक लावण्यात आलेले आहेत.
गणेशभक्तांना मार्गदर्शनसाठी जिल्हा वाहतूक शाखेकडून 100 स्वयंसेवकांची नेमणूक
गणेशभक्तांना मार्गदर्शन करण्यासाठी जिल्हा वाहतूक शाखेकडून १०० स्वयंसेवक नेमण्यात आले आहे. त्याचबरोबर वाहतुकीच्या नियमांची काटेकोरपणे पालन व्हावे यासाठी मार्गदर्शक पुस्तिकेचे देखील वाटप करण्यात येणार आहे. रायगड जिल्हा पोलीस नियंत्रण कक्ष क्रमांक ०२१४१/ २२ ८४७३, मोबाईल फोन क्र. ७४४७७११११० व जिल्हा वाहतूक शाखा रायगड क्र. ०२१४१ /२२०९१५ हे मोबाईल नं. सतत कार्यरत ठेवण्यात येणार आहेत.
मुंबई-गोवा महामार्गावर पेण पोलीस चौकी, वडखळ, नागोठणे वाकण फाटा, पाली फाटा, कोलाड, इंदापूर, माणगाव ३, नागली फाटा, महाड पोलादपूर या ठिकाणी १४ सीसीटीव्ही कॅमेरे बसविण्यात आले आहेत. तसेच पोलीस दलातर्फे पोलिसांना रेनकोट तसेच रात्रीच्या गस्ती पोलिसांना लीड ब्रेकर व रिफ्लेक्टर देण्यात आले आहेत. जिल्हा पोलीस व वाहतूक पोलिसांनी गणेशोस्तव काळात चाकरमान्यांचा प्रवास सुखकारक होण्यासाठी सर्व सुविधांनी युक्त असा बंदोबस्त करण्यात आला आहे.
