रायगड - किल्ले रायगडच्या पायथ्याशी चित्त दरवाजा येथे पुरातत्व विभागाने उभारलेले तिकीट घर शिवसैनिकांनी उखडून फेकून दिले आहे. आमदार भरत गोगावले यांच्या उपस्थितीत हे तिकीट घर शिवसैनिकांनी काढून टाकले आहे. त्यामुळे चित्त दरवाजा मोकळा झाला आहे.
शिवसैनिकांनी उखडली तिकीट घराची टपरी
किल्ले रायगडाच्या पायथ्याशी चित्त दरवाजा येथे केंद्रीय पुरातत्व विभागाने तिकिट घर उभारले होते. या उभारलेल्या तिकिट घरामुळे पार्किंग, बस सारख्या मोठ्या वळणाला त्रासदायक बनले होते. तिकीट घरामुळे चित्त दरवाजा येथील पायऱ्यांचे विद्रुपीकरण झाले असल्याचे शिवप्रेमींचे म्हणणे होते. त्याच बरोबर कोणत्याच सुविधा न देता पुरातत्व खाते तिकीटाच्या रुपाने पैशाची वसुली करणार होते. याबाबत संताप व्यक्त करत शिवप्रेमी आणि शिवसैनिकांनी तिकीट घररुपी टपरी रायगडच्या पायथ्यापासुन बाजुला केली.
आमदार भरत गोगावले यांनी घेतला पुढाकार
सोमवारी संध्याकाळी ही घटना घडली. जोरदार घोषणाबाजी करत शिवप्रेमी चित्त दरवाजाजवळ पोहोचले. पहारच्या साहाय्याने संपुर्ण ताकदीने हे तिकीट घर काढण्यात आले. किल्ले रायगड हे आमचे श्रद्धास्थान आहे. शिवरायांचे दर्शन घेण्यासाठी शिवप्रेमींना पैसे मोजावे लागतात याबाबत नाराजी व्यक्त करत पुन्हा तिकीट घर उभे राहणार नाही, असा सज्जड दम दिला. तसेच होणाऱ्या परिणामांना सामोरे जाऊ, असेही महाडचे आमदार भरत गोगावले यांनी यावेळी सांगितले.
हेही वाचा - शेतकऱ्यांच्या मुद्द्यावरून विरोधकांचे राज्यसभेतून वॉकआऊट, कामकाज तहकूब
