रायगड - जिल्हा परिषद अध्यक्षपदाची आरक्षण सोडत मंगळवारी 19 नोव्हेबरला मंत्रालयात पार पडणार आहे. याबाबत रायगड जिल्हा परिषदमध्ये अध्यक्ष पदाच्या आरक्षणासाठी इच्छुक डोळे लावून बसले आहेत. शेकापच्या सदस्या नीलिमा पाटील यांना अध्यक्ष पद देण्यात येणार असल्याचे आधीच जाहीर केले आहे. मात्र, आरक्षण खुला प्रवर्ग, ओबीसी सोडून एसटी अथवा इतर पडले तर अध्यक्ष पदाची माळ कोणाच्या गळ्यात पडणार? याकडे जिल्ह्याचे लक्ष लागले आहे.
रायगड जिल्हा परिषदेमध्ये शेकाप, राष्ट्रवादी काँग्रेस, काँग्रेस अशी आघाडी आहे. शिवसेना आणि भाजप विरोधी बाकावर बसले आहेत. शेकाप 23, शिवसेना 18, राष्ट्रवादी 12, काँग्रेस 3, भाजप 3 असे 59 चे बलाबल जिल्हा परिषदेमध्ये आहे.
हेही वाचा - पनवेल तहसील कार्यालयातील कारकुनाला लाच घेताना रंगेहाथ अटक
राष्ट्रवादी काँग्रेसचे 12 सदस्य निवडून आले असताना अध्यक्षपद, शिक्षण व आरोग्य आणि महिला बालकल्याण सभापतीपद शेकापने राष्ट्रवादीला दिले आहे. शेकापकडे उपाध्यक्ष, बांधकाम आणि अर्थ, समाजकल्याण आणि कृषी सभापती पद आहे. राष्ट्रवादी काँग्रेस पक्षाचा अडीच वर्षाचा कार्यकाळ संपला असून आता अध्यक्षपद शेकापकडे जाणार आहे.
राज्यातील सत्तेतील शिवसेना, काँग्रेस, राष्ट्रवादी काँग्रेस यांच्या आघाडीने रायगड जिल्हा परिषदेतील सत्तांतर होईल की तेच राहील हे आरक्षण सोडतीनंतरच समोर येणार आहे.
हेही वाचा - महाशिवआघाडी आली तरी पनवेल महापालिकेच्या चाव्या भाजपकडेच!
