लग्नाकार्य लांबणीवर गेल्याने फोटोग्राफी, व्हिडिओग्राफी व्यावसायिक आर्थिक अडचणीत

मार्च ते जून हे चार महिने लग्न सोहळ्यासाठी महत्वाचे असतात. कारण, अनेक जण या महिन्यात लग्नसोहळा संपन्न करत असतात. लग्नाची तारीख ठरल्यानंतर वर-वधूकडील नातेवाईक हे फोटोग्राफर आणि व्हिडिओग्राफी करणाऱ्यांना आधीच ठरवून ठेवतात. त्यामुळे हा व्यवसाय करणाऱ्यांसाठी हे महिने धावपळीचे असतात. कोरोनाच्या प्रादुर्भावामुळे लग्नसमारंभ हे लांबणीवर गेल्याने त्याच्याशी संलग्न असणाऱ्या फोटोग्राफी आणि व्हिडिओग्राफी व्यवसायाला घरघर लागण्याची वेळ आली आहे.

रायगड - मार्च ते जून हे महिने लग्न सोहळ्याचे असल्याने फोटोग्राफर, व्हिडिओग्राफर यांचे हे कमाईचे महिने असतात. या चार महिन्यात फोटोग्राफर, व्हिडिओग्राफर हा आपली वर्षभराची कमाई करत असतो. मात्र, यंदा या फोटोग्राफीच्या व्यवसायाला कोरोनाचे ग्रहण लागले असल्याने त्यांच्यावर आर्थिक संकटाची छाया पसरली आहे. कोरोनाच्या प्रादुर्भावामुळे लग्नसमारंभ हे लांबणीवर गेल्याने त्याच्याशी संलग्न असणाऱ्या फोटोग्राफी आणि व्हिडिओग्राफी व्यवसायाला घरघर लागण्याची वेळ आली आहे. रायगड जिल्ह्यात या व्यवसायाला 7 ते 8 कोटीचा आर्थिक फटका बसल्याची माहिती रायगड फोटोग्राफर आणि व्हिडिओ असोसिएशनचे अध्यक्ष विवेक सुभेकर यांनी सांगितले आहे. फोटोग्राफी व्यवसायाला शासनाकडून आर्थिक मदत मिळावी, अशी मागणीही असोसिएशनमार्फत करण्यात आली आहे.

मार्च ते जून हे चार महिने लग्न सोहळ्यासाठी महत्वाचे असतात. कारण, अनेक जण या महिन्यात लग्नसोहळा संपन्न करीत असतात. लग्नाची तारीख ठरल्यानंतर वर वधूकडील नातेवाईक हे फोटोग्राफर आणि व्हिडिओग्राफी करणाऱ्यांना आधीच ठरवून ठेवतात. त्यामुळे हा व्यवसाय करणाऱ्यांसाठी हे महिने धावपळीचे असतात. त्यासाठी नवीन कॅमेरे, व्हिडिओ कॅमेरे यांची खरेदी फोटोग्राफर व्यावसायिक करीत असतात. अल्बम बनविणाऱ्या कंपन्यांना अ‌ॅडव्हान्सही दिला गेलेला असतो. यासाठी छोटे मोठे फोटोग्राफर, फोटोशूटींग व्यावसायिक हे आपली जमा पुंजी अथवा कर्ज काढून व्यवसायात टाकत असतात.कोरोनामुळे देशभरात संचारबंदी लागू केली असल्याने गर्दी टाळा, असे आदेश जिल्हा प्रशासनाकडून देण्यात आलेले आहेत. या आदेशामुळे एप्रिल, मे, जून महिन्यात होणारी लग्नकार्य सोहळे लांबणीवर गेली आहेत. याचा फटका हा आता फोटोग्राफी, व्हिडिओग्राफी व्यवसायाला बसला आहे. सर्व महाराष्ट्रात हीच परिस्थिती असून रायगड जिल्ह्यातील व्यवसायिकही चिंतेत सापडले आहेत. लग्न सोहळे पुढे गेल्याने ऑर्डर रद्द झाले असल्याने पैसे मिळणार नाहीत. त्यामुळे स्टुडिओचे भाडे, नोकरीस असणाऱ्या कर्मचाऱ्यांचे पगार, तसेच कौटुंबीक गरजा कशा भागवायच्या? असा प्रश्न या व्यवसायिकासमोर उभा ठाकला आहे. याबाबत संघटनेमार्फत एकमेकाला हातभार लावला जात असला तरी शासनानेही आमच्यासारख्या छोट्या व्यवसायिकांना आर्थिक मदतीचा हात पुढे करावा, अशी भावना अध्यक्ष विवेक सुभेकर यांनी बोलून दाखवली.