रायगड - कोरोना प्रादुर्भावामुळे मार्चपासून सप्टेंबरपर्यंत पर्यटनासाठी बंदी घालण्यात आली होती. यात रायगड जिल्ह्यासह अलिबाग तालुक्यातील नागाव येथील पर्यटनही बंद होते. पण आता सात महिन्यानंतर 1 ऑक्टोबरपासून पुन्हा पर्यटन खुले करण्यात येत आहे. नागाव ग्रामपंचायतीने पर्यटन खुले करण्यास परवानगी दिली आहे. कॉटेज व्यवसायिकांनीही पर्यटन सुरू होत असल्याने तयारी सुरू केली आहे. त्यामुळे पुन्हा एकदा नागावमधील रस्ते, समुद्र किनारे पर्यटकांनी बहरण्यास सुरूवात होणार आहेत.
आता नागावमधील पर्यटन सुरू करण्यास ग्रामपंचायतीने परवानगी दिली आहे. कॉटेजधारकांना मोफत सॅनिटायझर फवारणीही ग्रामपंचायत सरपंच आणि सामाजिक संस्थांच्या मार्फत करून दिली जाणार आहे. त्यामुळे पर्यटन सुरू होण्याआधी सर्व उपाययोजना ग्रामपंचायत आणि कॉटेजधारकाकडून करण्यात येत आहे.
सात महिन्यापासून पर्यटन बंद असल्याने आर्थिक विवंचनेत आम्ही अडकलो आहेत. पुन्हा आता 1 ऑक्टोबरपासून पर्यटन खुले झाल्याने आनंद झाला आहे. पर्यटकाची बुकिंगही येण्यास सुरूवात झाली आहे. त्यादृष्टीने कोरोनाच्या अनुषंगाने नियम पाळून ग्राहकांना सुविधा पुरविणार आहोत, अशी माहिती कॉटेजधारक अक्षय घरत यांनी दिली.
