पनवेल - भाजपचे आमदार प्रशांत ठाकूर यांचा उमेदवारी अर्ज दाखल करण्यासाठी पनवेलमध्ये कार्यकर्त्यांनी गर्दी केली आहे. पनवेलमध्ये जोरदारपणे शक्तीप्रदर्शन करून 'एकच वादा, प्रशांत दादा' असा नारा कार्यकर्त्यांनी दिला आहे. या रॅलीमध्ये आमदार प्रशांत ठाकूर यांचे वडील आणि माजी खासदार रामशेठ ठाकूर हे देखील उपस्थित होते. प्रशांत ठाकूर यांच्या रॅलीत शिवसेना आणि आरपीआयचे कार्यकर्तेदेखील मोठ्या संख्येने सहभागी झाले आहेत.
हेही वाचा - मिळेल त्याला गळाला लावण्याचा राष्ट्रवादीचा प्रयत्न यशस्वी होणार नाही- गिरीश महाजन
भाजप, शिवसेना, आरपीआय (आ) महायुतीतर्फे पनवेल विधानसभा मतदारसंघातील भाजप जनसंपर्क कार्यालय येथून प्रशांत ठाकूर यांची ही रॅली काढण्यात आली. येथूनच ढोल-ताशे, लेझीम व बेंजोच्या निनादात भव्य रॅली सुरू झाली. जागो-जागी महिला भगिनींनी औक्षण करून फुलांचा वर्षाव केला. सकाळपासूनच संपूर्ण शहर प्रशांतमय झाले आहे. पनवेल मतदारसंघातून प्रशांत ठाकूर दुसऱ्यांदा रिंगणात उतरले आहेत.
