रायगड - शिवसेना-भाजप युती झाल्याची घोषणा पत्रकाद्वारे करण्यात आलेली आहे. त्यामध्ये उरण विधानसभा मतदारसंघ शिवसेनेकडे आहे. विद्यमान आमदार मनोहर भोईर यांना येथून उमेदवारी देण्यात आली आहे. तर युती झालेली असताना भाजपचे नेते, जेएनपीटीचे विश्वस्त व केंद्रीय मंत्री नितीन गडकरी यांचे निकटवर्ती महेश बालदी यांनी उरण विधानसभा मतदारसंघातून अपक्ष उमेदवारी अर्ज दाखल केला आहे. त्यामुळे युतीत बिघाडी होण्याची शक्यता निर्माण झाली आहे.
हेही वाचा - रायगडमध्ये राष्ट्रवादीला धक्का; आमदार सुरेश लाड यांचा निवडणूक लढवण्यास नकार
उरण विधानसभा मतदारसंघ हा शिवसेनेला सोडलेला आहे. 2014 च्या विधानसभा निवडणुकीत शेकापचे उमेदवार विवेक पाटील यांचा पराभव करून मनोहर भोईर विजयी झाले होते. विद्यमान आमदार मनोहर भोईर यांनाच पुन्हा शिवसेनेने तिकीट दिले आहे. उरण विधानसभा मतदातसंघ भाजपला सोडण्याची मागणी करण्यात आली होती.
हेही वाचा - पीएमसी बँकेनंतर पनवेलमध्ये आणखी एक अर्बन बँक डबघाईला
महेश बालदी हे केंद्रीय मंत्री नितीन गडकरी यांचे निकटवर्ती आहेत. उरण शहरात त्यांचे वजन आहे. निवडणूक जाहीर होण्याआधीपासून महेश बालदी यांनी प्रचाराला सुरुवात केली होती. शिवसेना-भाजप युती झाली असली, तरी उरणची जागा शिवसेनेला सुटली आहे. त्यामुळे बालदी यांनी अपक्ष उमेदवारी अर्ज निवडणूक निर्णय अधिकारी यांच्याकडे दाखल केला आहे.
भाजपचे महेश बालदी यांनी उमेदवारी अर्ज दाखल केल्याने शिवसेनेच्या गोटात चलबिचल निर्माण झाली आहे. त्यामुळे निवडणुकीआधीच उरण मध्ये युतीत बिघाडी झाल्याचे दिसत आहे. भाजपची मते विभागली जाणार असल्याने शिवसेनेचे उमेदवार मनोहर भोईर यांना फटका बसण्याची शक्यता आहे.
