रायगड - परंपरागत शेतीला नाविन्यपूर्ण प्रयोग आणि संशोधनाची जोड दिली तर शेतीतही उत्पन्न मिळत असल्याचे रायगड जिल्ह्यातील एका 56 वर्षाच्या शेतकऱ्याने दाखवून दिले आहे. हिफझुर फकीह असे या शेतकऱ्याचे नाव आहे.
म्हसळा तालुक्यातील वरवठणे (मुजफ्फर नगर) येथील शेतकरी हिफझुर फकीह यांना त्यांच्या वडिलांकडून शेतीचा वारसा मिळाला आहे. त्यांनी इस्त्राईल पद्धतीचा वापर करून शेती केली आहे. फकीह यांनी पहिल्या बारा गुंठ्यात बेड आणि ठिबक सिंचनाचा वापर करून आल्याची शेती केली. फकीह यांनी केलेला आल्याच्या शेतीचा प्रयोग हा जिल्ह्यातील पहिलाच प्रयोग आहे. याच पद्धतीने आणखी बारा गुंठ्यात कलिंगडाची लागवड केली. फकीह यांना एकूण चोवीस गुंठ्यातील आले आणि कलिंगडच्या शेतीसाठी अडीच लाख रूपये खर्च आला. शेतीतून आठ टन आले आणि पाच टन कलिंगडाचे उत्पादन मिळण्याची फकीह यांना खात्री आहे.बाजार भावानुसार या उत्पादनाची मिळकत दहा लाख रुपये होईल, असे फकीह यांनी संगितले.
हेही वाचा - प्रतिबंध समितीच्या सतर्कतेमुळे नियोजीत बालविवाह रोखण्यात यश
रायगड जिल्हा परिषदेचे कृषी पशुसंवर्धन सभापती बबन मनवे, म्हसळा पंचायत समितीच्या सभापती उज्वला सावंत, माजी सभापती छाया म्हात्रे, उपसभापती मधु गायकर, सदस्य संदीप चाचले, उपनगराध्यक्ष शोएब हळदे, गटविकास अधिकारी वाय.एस.प्रभे, कृषी अधिकारी मंगेश साळी, विस्तार अधिकारी अशोक बाक्कर, प्रदीप डोलारे, राष्ट्रवादी तालुका अध्यक्ष समीर बनकर, अनिस हवालदार, फरूक पेनकर, नईम दळवी यांनी यांनी फकीह यांच्या शेतात जाऊन शेतीची पाहणी केली.
फकीह यांच्या सारखी शेती व्यवसायामध्ये आधुनिकता आणणार्‍या आणि प्रयोगशील शेतकर्‍यांना प्रोत्साहन देण्यासाठी रायगड जिल्हा परिषद कायम तत्पर असेल असे, आश्वासन जिल्हा परिषदेचे कृषी पशु संवर्धन सभापती बबन मनवे यांनी दिले.
