रायगड - महाड सावित्री पूल दुर्घटनेला शुक्रवारी तीन वर्षे पूर्ण होत आहेत. यानिमित्ताने एसटी आगार महाडतर्फे एसटी बसमधील मृत प्रवाशांना भावपूर्ण श्रद्धांजली वाहण्यात आली. त्यामुळे 2 ऑगस्टच्या त्या काळरात्रीच्या आठवणी पुन्हा एकदा ताज्या झाल्या आहेत.
2 ऑगस्ट 2016 रोजी जिल्ह्यात मुसळधार पाऊस व पूरपरिस्थिती निर्माण झाली होती. अशातच महाड सावित्री नदीवरील ब्रिटिशकालीन पूल तुटून वाहून गेला. काळोख्या रात्री पूल तुटल्याची किंचितही माहिती या रस्त्यावरून येणाऱ्या वाहनांना नव्हती. अशात कोकणातून मुंबईकडे येणाऱ्या दोन एसटी बस व एक स्कॉर्पियो कार या पुलावरून खाली नदीत पडल्या. त्यामधील 28 जणांना जलसमाधी मिळाली. सावित्री नदी किनारी असलेल्या एका टायर दुरुस्ती दुकानदाराला पूल वाहून गेल्याचे दिसले. त्यानंतर त्याने प्रसंगावधान दाखवून मागून येणाऱ्या वाहनांना थांबविले. त्यामुळे पुढे होणारा अनर्थ टळला. मात्र तोपर्यत दोन एसटी बस व स्कॉर्पियो मधील प्रवाशांना आपले प्राण गमावले होते.
या दुर्घटनेनंतर जिल्हा प्रशासन खडबडून जागे झाले. त्यानंतर नदीत बुडालेल्या प्रवाशांचा शोध घेणे सुरू झाले. यासाठी आपत्ती व्यवस्थापन, स्थानिक प्रशासन, ग्रामस्थ यांनी शोध कार्य रात्रीच सुरू केले. एनडीआरएफ जवान घटनास्थळी दाखल झाले. त्यानंतर एक एक मृतदेह बाहेर काढण्यास सुरुवात केली. मात्र पडत असलेल्या मुसळधार पावसाने व नदीमध्ये वाढलेल्या पाण्यामुळे अडचणी येत होत्या. या अडचणींवर मात करून प्रवाशांचा शोध सुरू होता. तब्बल 14 दिवस हे शोध कार्य सुरू होते.
नदीचे पाणी कमी झाल्यानंतर एसटी बस व स्कॉर्पियोचा सांगडा बाहेर काढण्यात आला. या दुर्घटनेत रत्नागिरी जिल्ह्यातील 28 जण बुडून मृत्युमुखी पडले होते. शुक्रवारी या दुर्घटनेला तीन वर्षे पूर्ण झाले आहेत. महाड सावित्री पूल पडल्यानंतर शासनाने 160 दिवसात नवीन बांधून रहदारीसाठी सुरू करण्यात आला. मात्र आजही 2 ऑगस्टची ती रात्र रत्नागिरी वासियासाठी काळरात्र ठरली होती.
