रायगड - असाध्य ते साध्य करीता सायास'..या उक्तीस अनुसरून ज्या मुलास लहानपणी बोलता येत नव्हते, हात पायात पीळ होणे, डोळे तिरळे होणे, बसता येण्याची सुतराम शक्यता नव्हती. अशी बहुविकलांगपणाची लक्षणे असलेल्या "सेरेब्रल पाल्सी' या असाध्य आजाराने ग्रस्त असलेल्या न्यू इंग्लिश स्कूल म्हसळा शाळेतील कुमार ऋषिकेश शितल सुदाम माळी या विद्यार्थ्याने माध्यमिक शालांत प्रमाणपत्र परिक्षेत सेमी इंग्रजी माध्यमात ८६.६० टक्के गुण मिळवत उत्तुंग यश प्राप्त केले. तसेच दिव्यांग प्रवर्गात प्रथम क्रमांक मिळवला.
विविध समस्यांमुळे ऋषिकेश अधून मधूनच शाळेत जात असे. तसेच त्याला पूर्ण वेळ शाळा कधीच करता आली नाही. त्याने आपल्या यशाचे श्रेय आई-वडील शाळेतील शिक्षक व प्राचार्य बी.एन. माळी यांना दिले. तसेच शाळेचे चेअरमन समीर बनकर यांनी त्याला वेळोवेळी केलेल्या विविध प्रकारच्या सहकार्याबद्दल ऋषिकेशने त्यांचे विशेष आभार मानले.
९ वी परीक्षेनंतर १० वी पाठ्यपुस्तकांचे सखोल वाचन, लोकसत्ता मधील "यशस्वी भव' या सदराचा नियमित अभ्यासात वापर, विविध यु ट्युब चॅनेलवरील मार्गदर्शन, तसेच पाष्टी शाळेतील सर्व शिक्षकांचे घरी मिळणारे मार्गदर्शन व शेवटी बाल भारती व नवनीतच्या प्रश्नपत्रिकांचा सराव यामुळे परीक्षेत यश मिळवणे सोपे झाल्याचे ऋषीकेशने सांगितले.
अभ्यासाबरोबरच आई बाबांनी माझा व्यायाम, फिजिओथेरेपी, योगासने, आहार व आरोग्य याची काळजी, सायकलिंग व नियमित चालणे, गायन इत्यादी बाबींवर कटाक्षाने मेहनत घेतल्याचे ऋषिकेशने आवर्जून सांगितले. इयत्ता १० वी अभ्यासक्रमातील अरूणिमा सिन्हा , वैज्ञानीक स्टिफन हँकिंग , O God forgive me या पाठ्य पुस्तकातील धड्यांनी माझ्या जीवनावर प्रभाव टाकल्याचे त्याने सांगितले. तसेच विज्ञानातील "स्टेम -सेल'थेरेपी या आधुनिक ऊपचाराचा त्याने जानेवारी महिन्यात स्वत:वर अनुभव घेतला. उपचारानंतर मार्च महिन्यात थेरेपी व सततच्या बसण्यामुळे पाठदुखीने त्रस्त असतानासुद्धा या सगळयांशी झुंजत मंजूर असलेल्या लेखनिकास मागच्या बेंचवर बसवून स्वतः हाताने पेपर लिहून सर्व प्रश्न व उत्तराचे मुद्दे पूर्ण करण्याचा प्रयत्न करत यशाचे शिखर गाठले.
"सेरेब्रल पाल्सी' म्हणजे मेंदूचा पक्षाघात जन्मभर साथ देणाऱ्या आजारावर मात करून ऋषिकेशने उत्तुंग यश संपादन केल्याबद्दल ऋषिकेशवर शुभेच्छांचा वर्षाव होत आहे. भविष्यात परीक्षा देऊन ऋषिकेशला अधिकारी बनवून दिव्यांग व खासकरून सेरेब्रल पाल्सीग्रस्त पाल्य व पालक यांचे मनोबल उंचावण्यासाठी व उज्ज्वल भविष्यासाठी काम करणार असल्याचे त्याची आई शितल माळी यांनी सांगितले.
