पुणे - लोणावळ्यातील नागफणी पॉईंट येथील घनदाट ( Youth missing Lonavala forest ) जंगलात 24 वर्षीय तरुण बेपत्ता झाला आहे. फरान सेराजुद्दीन, असे बेपत्ता झालेल्या तरुणाचे नाव असून तो दिल्ली येथील राहणारा आहे. तो काही कामानिमित्त पुण्यात आला होता. तिथून लोणावळ्यात आला आणि एकटाच नागफणी पॉईंट येथे फिरण्यास गेला. जाताना तो ज्या रस्त्याने गेला तो रस्ताच विसरला, आपण चुकलो असे समजताच त्याने भाऊ आणि आई वडिलांना फोन, मॅसेज करून याची कल्पना दिली होती. कुटुंबीय चिंतेत आहेत. त्याला शोधणाऱ्यास 1 लाखांचे बक्षीस कुटुंबीयांनी जाहीर केले आहे.
हेही वाचा - MHADA Paper leak case : म्हाडा परीक्षा पेपरफुटी प्रकरणात आणखी एक एजंट जेरबंद
फरान सेराजुद्दीन हा एका रोबोट कंपनीत अभियंता म्हणून काम करतो. तो शुक्रवारी पुण्यात आला होता. तिथून त्याने लोणावळा गाठले. फरान नागफणी पॉईंट येथे एकटाच फिरण्यास गेला. परंतु, फरान ज्या रस्त्याने गेला तोच रस्ता विसरला. त्याने तात्काळ भाऊ, आई, वडील यांच्याशी मोबाईलवरून संपर्क केला. याबाबत त्याने माहिती दिली. लोणावळा पोलिसांशी कुटुंबीयांनी संपर्क साधला. मात्र, तोपर्यंत फरानचा मोबाईल बंद झाला होता, अशी माहिती लोणावळा शहर पोलिसांनी दिली. त्याचा शोध पोलीस घेत आहेत. गेल्या तीन दिवसांपासून फरान बेपत्ता आहे. त्याचे कुटुंबीय चिंतेत आहेत. त्याला शोधणाऱ्यास 1 लाखाचे बक्षीस कुटुंबीयांनी जाहीर केले आहे.
लोणावळा शहर पोलिसांपुढे मोठे आव्हान - लोणावळा शहर पोलिसांचे पथक फरानचा शोध घेत आहे. त्यांच्या सोबतीला कुकुंडी गावचे ग्रामस्थ, तरुण आहेत. तसेच, डॉग स्कॉड, एटीएस स्टाफ, ड्रोन कॅमेऱ्याद्वारे, रेस्क्यू टीम खोपोली, शिवदुर्ग हे सर्व त्याचा शोध घेत आहेत. घनदाट जंगल, खोल दरी असल्यामुळे त्याचा शोध घेणे मोठे आव्हानात्मक झाले आहे.
हेही वाचा - Monsoon Latest Update : यंदा मान्सून एक आठवडा आधीच, काय आहेत कारणे? पहा ईटीव्ही भारतचा स्पेशल रिपोर्ट
