पुणे - पुणे-मुंबई द्रुतगती मार्गावर ओला कॅबमधून प्रवास करणाऱ्या प्रवाशांना लुटणाऱ्या टोळीतल्या दोघांना तळेगाव पोलिसांनी जेरबंद केले आहे. एप्रिल महिन्यात २० ते २६ तारखेच्या दरम्यान तब्बल दहा ते बारा प्रवाशांना मोटारीतून नेऊन मारहाण करत लुटल्याची कबुली आरोपींनी दिली आहे. याप्रकरणी आरोपी पप्पू शिवाजी कांबळे, सनी गौतम घाडगे यांना निगडी परिसरातून अटक करण्यात आली आहे, तर एक आरोपी फरार असल्याचे तळेगाव पोलिसांनी सांगितले.
एप्रिल महिन्याच्या शेवटच्या आठवड्यात तक्रारकर्ते प्रताप खिमाजी भानुशाली आणि त्यांचा भाऊ हे मध्यरात्री साडेबाराच्या सुमारास मुंबईला जाण्यासाठी हिंजवडी भुजबळ चौक येथे बसची वाट पाहत थांबले होते. तेवढ्यात ओला कॅब चालकाने प्रत्येकी ३०० रुपयात अंधेरीपर्यंत सोडतो असे सांगून त्यांना गाडीत घेतले. यावेळी कारमध्ये पाठीमागील सीटवर दोघेजण अगोदरच बसले होते. भानुशाली यांनी त्यांच्याकडील रोख रक्कम २० हजार रुपये असलेली बॅग डिक्कीत ठेवली.
पुण्याहून मुंबईच्या दिशेने प्रवास करत असताना पुणे-मुंबई द्रुतगती मार्गावरील लोढा प्रकल्पाच्या पुढे जाताच प्रताप आणि त्यांच्या भावाला चाकूचा धाक दाखवत मारहाण करून गाडीच्या खाली ढकलून देण्यात आले, आणि त्यांना तिथेच सोडून आरोपींनी पळ काढला. पीडित प्रताप यांनी तळेगाव पोलिसात फिर्याद दिली. त्याप्रमाणे तळेगाव पोलिसांनी तपास सुरू केला आणि आरोपींना जेरबंद केले.
अद्याप एक आरोपी फरार असून दोघांना अटक केली आहे. २० ते २६ एप्रिल दरम्यान पप्पू आणि सनीसह इतर एका आरोपीने डांगे चौक, वाकड पूल, देहूरोड, सिम्बॉसिस कॉलेज, किवळे या परिसरातून तब्बल दहा ते बारा प्रवाशांना पुणे-मुंबई द्रुतगतीमार्गावर प्रवास करत असताना चाकूचा धाक दाखवत लुटल्याची कबुली दिली आहे.
