पुणे - लोणीकाळभोर येथील चेतन ज्वेलर्स या सराफा दुकानात डिसेंबर २०१८ मध्ये चोरी झाली होती. दुकान मालकाचे लक्ष विचलित करून सोन्या चांदीचे दागिने चोरणाऱ्या टोळीतील ३ महिला आरोपींना पुणे ग्रामीण शाखेच्या पोलिसांनी अटक केली. नंदिनी उर्फ नंदा प्रकाश चव्हाण (वय ३८) रिना यशवंत पवार (वय २७) आणि पूनम काळू पडवळ (वय २९) अशी आरोपी महिलांची नावे आहेत.
आरोपींची चौकशी केली असता त्यांनी व नंदा चव्हाण हिचा १४ वर्षाचा अल्पवयीन मुलगा असे मिळून सोन्याचे दागिने चोरी केल्याचे सांगितले आहे. ११ डिसेंबर २०१८ रोजी आरोपी महिलांनी चेतन ज्वेलर्समधे संगनमताने दागिने खरेदीचा बहाणा केला. दुकानदाराची नजर चुकवून दीड लाख रुपये किमतीचे सोन्याचे दागिने चोरून नेले होते.
याप्रकरणी दुकान मालक गोपाळ शंकर वर्मा यांनी लोणीकाळभोर पोलीस स्टेशनमध्ये तक्रार दिली होती. त्यानुसार चोरीचा गुन्हा दाखल करण्यात आला होता. पोलिसांनी तपासादरम्यान दुकानातील सीसीटीव्ही तपासले आणि व्हायरल केले असता फुटेजमधील वर्णणाच्या महिला कात्रज पुणे परिसरात राहत असल्याची माहिती मिळाली. त्यानंतर कात्रज येथे जावून तेथील परिसरात फूटेजमधील महिलांचे फोटो दाखवले असता या महिला त्याच असल्याची खात्री झाली.
