पुणे - टीईटी घोटाळ्यात ( TET Scam ) अटक करण्यात आलेल्या आयएएस अधिकारी आरोपी सुशील खोडवेकर ( TET Scam Accused Tested Corona Positive ) याला कोरोनाची लागण झाली असून आज त्याची न्यायालयात व्हिडीओ कॉन्सफरिंगद्वारे सुनावणी करण्यात आली. यावेळी पोलिसांनी त्याची कोठडी कायम ठेवण्याची मागणी केली. तर सुशील खोडवेकरचे वकील अमोल डांगे यांनी जामिनासाठी अर्ज दाखल केला आहे.
31 जानेवारीपर्यत पोलीस कोठडीत ठेवण्याचे आदेश -
टीईटी परीक्षा घोटाळा प्रकरणी पुणे सायबर पोलिसांनी कृषी विभागातील अधिकारी सुशील खोडवेकर याला ठाण्यातून शनिवारी अटक केली होती. खोडवेकर याला दअटक केल्यानंतर पुण्यातील शिवाजीनगर न्यायालयात हजर करण्यात आले असता, त्याला 31 जानेवारीपर्यत पोलीस कोठडीत ठेवण्याचे आदेश देण्यात आले होते. आज त्याची पोलीस कोठडी संपणार असल्यामुळे त्याला न्यायालयात हजार करण्यात येणार होते; परंतु कोरोनाची लागण झाल्यामुळे त्याची व्हिडीओ कॉन्सफरिंगद्वारे सुनावणी झाली.
सुशील खोडवेकर हा १३वा आरोपी -
परीक्षा आयोजनातील अक्षम्य चुकांमुळे शिक्षण विभागाने बंगळुरूच्या जीए सॉफ्टवेअर टेक्नॉलॉजी प्रा. लि. कंपनीस काळ्या यादीत टाकले होते. तेव्हा तिला काळ्या यादीतून बाहेर काढण्याची सूचना खोडवेकरने राज्य शिक्षण परिषदेचा तत्कालीन अध्यक्ष तुकाराम सुपेला केली होती. हे काम तसेच त्यानंतर वेळोवेळी सुपे, सावरीकर, देशमुख आणि एजंट मनोज डोंगरे यांच्या तो संपर्कात होता. टीईटी घोटाळाप्रकरणी अटक करण्यात आलेला खोडवेकर हा १३वा आरोपी आहे.
कोण आहेत सुशील खोडवेकर -
सुशील खोडवेकर 2009च्या बॅचचा आयएएस अधिकारी असून शालेय शिक्षण आणि क्रीडा विभागात उपसचिव म्हणून काम केलं आहे. सध्या खोडवेकर कृषी विभागात उपसचिव म्हणून कार्यरत आहे. टीईटी परीक्षा घेण्याची जबाबदारी असलेल्या जीए टेक्नॉलॉजीज कंपनीला शिक्षण परिषदेकडून 2020 मध्ये ब्लॅकलिस्ट करण्यात आले होते. मात्र, शिक्षण परिषदेचा निलंबित अध्यक्ष तुकाराम सुपे याने सुशील खोडवेकरच्या सांगण्यावरून जीए टेक्नॉलॉजीज कंपनीला ब्लॅकलिस्टमधून बाहेर काढले. त्यानंतर या कंपनीला पुन्हा टीईटी परीक्षा घेण्याचे कंत्राट त्यांनी दिल्याची माहिती पुढे आली आहे. या प्रकरणात खोडवेकरने आर्थिक व्यवहार केल्याचीही माहिती मिळत आहे.
आतापर्यंत 40 पेक्षा अधिक जणांना अटक -
टीईटी परीक्षा घोटाळ्याप्रकरणी आतापर्यंत 40 पेक्षा अधिक जणांना अटक करण्यात आली आहे. महाराष्ट्र राज्य परीक्षा परिषदचे आयुक्त तुकाराम सुपे यांना अटक केल्यानंतर पोलिसांनी 2018च्या घोटाळ्यातील आरोपी सुखदेव डेरे यांना अटक केली. आरोग्य भरती, म्हाडा, टीईटी घोटाळा प्रकरणी जी ए टेक्नॉलॉजीचे आश्विनकुमार होते. त्यालादेखील अटक केली आहे. याप्रकरणी प्रीतिश देशमुख, हरकळचे दोन्ही भाऊ आणि सावरीकर यांनाही अटक केली आहे. अशा पद्धतीने आत्तापर्यंत म्हाडा, आरोग्यफुटी आणि टीईटी परीक्षेत 40 पेक्षा अधिक आरोपींना अटक करण्यात आली आहे.
हेही वाचा - Varsha Gaikwad on Students Agitation : सरकार चर्चेला तयार, विद्यार्थ्यांनी मोर्चे काढू नयेत - वर्षा गायकवाड
