पुणे- शहरात मार्च ते ऑक्टोबर मध्यापर्यंत तब्बल ७२० टन कोविड कचरा जमा झाला होता. त्याची वेळोवेळी विल्हेवाट लावण्याचे मोठ्या जिकिरीचे काम प्रशासनाने केले आहे.
जैव वैद्यकीय कचरा ही मोठी समस्या आहे. या कचऱ्याची योग्य विल्हेवाट लावणे अत्यंत गरजेचे आहे. यात हयगय झाल्यास कोरोनाचा संसर्ग वाढण्याचा धोका असल्याने प्रशासनाकडून या कचऱ्याची विल्हेवाट लावण्याचे नियोजन करण्यात आले. त्यानुसार काम सुरू आहे. त्या अंतर्गत होम क्वारंटाईन आणि आयसोलेशन सेंटरमध्ये निर्माण होणारा कचरा गोळा करण्यासाठी सफाई कर्मचाऱ्यांना खास प्रशिक्षण देण्यात आले आहे.
कोविड जैव वैद्यकीय कचऱ्याची विल्हेवाट लावण्यासाठी पुण्यातील पास्को एन्व्हायरोमेंट सोल्युशन प्रा.लि या कंपनीला काम देण्यात आले होते. या कंपनीची प्रतिदिन २ हजार ७०० किलो कचऱ्याची विल्हेवाट लावण्याची क्षमता होती. मात्र, शहरात मे दरम्यान साधारण २ हजार २०० ते २ हजार ४०० किलो कचरा निर्माण होत होता. तो वाढून ५ हजार किलो प्रतिदिवस पर्यंत गेला. त्यामुळे, अतिरिक्त कचरा हा बारामती येथील जय भवानी बायोमेडिकेअर सिस्टीम या कंपनीकडे पाठवला गेला.
कोविड विषाणूच्या उपचारामधून निर्माण होणाऱ्या जैव वैद्यकीय कचऱ्याच्या व्यवस्थापनाबाबत पुणे महानगरपालिका आणि पिंपरी-चिंचवड महानगरपालिका क्षेत्रात दोन जैव वैद्यकीय कचऱ्याचे व्यवस्थापन करणारे प्रकल्प उभारण्याचे नियोजन करण्यात आले. जैव वैद्यकीय कचऱ्यातून अन्य आजार किंवा संसर्ग बळावण्याची दाट शक्यता असल्याने या कचऱ्याचे व्यवस्थापन होण्याची गरज होती. त्यावर लक्ष केंद्रित करण्यात आले होते.
आता रुग्ण संख्या कमी होत असल्याने सध्या तीन ते साडेतीन हजार किलो कोविड संबंधी कचरा निर्माण होत आहे. एकंदरीतच कोरोना विरोधातल्या या लढाईत अनेक पातळ्यांवर काम सुरू आहे. त्यात कोविड मेडिकल कचरा निर्मुलन ही बाब देखील अत्यंत महत्वाची असून, हे जिकरीचे काम सुरळीत केले जाते आहे. अन्यथा नव्या समस्येला तोंड द्यावे लागले असते.
हेही वाचा- धक्कादायक! आजारी व्यक्तीला गंभीर जखमी करून जिवंत जाळले; तासाभरातच आरोपीला अटक
