पुणे - मुलाच्या पराभवाने अजित पवारांचे तोंड काळवंडले असून 'मस्ती माझी नाही तर, मस्ती तुमची जिरली' असे म्हणत शिवाजी आढळराव पाटीलांनी राष्ट्रवादीचे नेते अजित पवारांवर निशाणा साधला. लोकसभेतील पराभवामुळे आढळराव पाटील यांची 'मस्ती जिरली' असल्याची टीका अजित पवार यांनी केली होती. या टीकेला आढळराव पाटील यांनी प्रत्युत्तर दिले.
आढळराव पाटील यांनी शिरुर येथे पत्रकार परिषद घेत अजित पवार यांच्यावर टिका केली. स्वत:च्या मुलाला निवडून आणता आले नाही, म्हणून त्यांच्या पराभवाने अजित पवारांचे तोंड काळवंडले असल्याचे आढळराव पाटील म्हणाले.
मुलाला मावळ लोकसभा मतदारसंघातून निवडून आणता आले नाही, त्यांनी माझ्यावर टिका करणे हा विनोद आहे. लक्षात ठेवा 'माझ्या शिवसेना पक्षाचे राज्यात 18 खासदार आहेत. तुमच्या पक्षाचे फक्त 4 खासदार आहे'. माझा पराभव झाला मान्य आहे. परंतु, जे निवडून आले ते केवळ मालिकेमुळे निवडून आले आहेत. पराभवानंतरही पक्षाने माझा योग्य सन्मान केला असल्याचे आढळराव पाटील म्हणाले.
पार्थ जर पडला तर मी राजकारणातून निवृत्त होईन, असे वक्तव्य अजित पवारांनी निवडणुकीदरम्यान केले होते. या केवळ तोंडाच्या वाफा असून घरचा पक्ष फोडणारा हा माणूस असल्याची टिकाही आढळराव पाटलांनी केली. मी लोकांशी नम्र वागणारा माणूस असून आव्हानात्मक भाषा मी कधी केली नाही. अहंकाराने कधी वागलो नाही. माझ्या पक्षात माझा चांगला सन्मान असून माझ्या पराभवाची चिंता तुम्ही करु नये, असे म्हणत अजित पवारांना त्यांनी लक्ष्य केले.
