Shiv Jayanti 2023: पुढील वर्षी कोणत्याही शिवसैनिकांची अडवणूक होणार नाही- मुख्यमंत्री एकनाथ शिंदे

किल्ले शिवनेरीवर आज राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या प्रमुख उपस्थित शिवजन्म सोहळा पार पडत आहे. किल्ले शिवनेरीवर आलेल्या शिव भक्तांना शिवनेरी किल्ल्याच्या शिवाई देवी मंदिराच्या इथे थांबविण्यात आले. शासकीय कार्यक्रम सुरू असल्याचे सांगितले जाऊन या शिव भक्तांना थांबविण्यात आले होते.

पुणे : आक्रमक झालेल्या शिवभक्तांकडून जोरदार घोषणाबाजी करत मुख्य कार्यक्रम थांबविण्यात आले. यावेळी प्रशासनाच्या या कारभारावर माजी खासदार छत्रपती संभाजी राजे हे देखील आक्रमक झाले होते. मुख्य कार्यक्रम काही वेळ थांबविण्यात आले होते. यावेळी माजी खासदार छत्रपती संभाजी राजे यांनी मुख्यमंत्री आणि उपमुख्यमंत्री यांना काही मागण्या केल्या आहेत. यात त्यांनी म्हटले आहे की, शासकीय कार्यक्रम जो होतो, त्या कार्यक्रमाला सामान्य शिवभक्तांना अडवले जाते.

कोणत्याही शिवसैनिकांची अडवणूक होणार नाही : प्रशासन व्हीआयपी पास कोणकोणत्या लोकांना देत असते? हे व्हीआयपी कोणाच्या म्हणण्यानुसार दिले जातात? सर्वसामान्य नागरिकांना एक न्याय आणि व्हीआयपी लोकांना एक न्याय दिला जातो. हे चुकीचे आहे. तसेच शासकीय कार्यक्रमाला जेव्हा मंत्री हेलिपॅडने येतात तेव्हा खूप वेळ शिवभक्तांना थांबविले जाते. हे देखील थांबविले पाहिजे, अश्या मागण्या यावेळी राजे यांनी केली. यावेळी मुख्यमंत्री एकनाथ शिंदे म्हणाले की, आपण दिलेल्या सूचनांचा आम्ही नक्कीच विचार करणार आहे. पुढील वर्षी कोणत्याही शिवसैनिकांची अडवणूक होणार नाही. सर्वांना न्याय हे दिला जाणार आहे. असे देखील यावेळी मुख्यमंत्री एकनाथ शिंदे म्हणाले. मुख्यमंत्री आणि उपमुख्यमंत्री यांच्या उपस्थितीत हजारो शिवभक्तांचे घोषणा बाजी केली. भाविकांना दर्शनासाठी सोडण्यात न आल्याने शिवभक्त आक्रमक झाले होते.

आग्र्याच्या किल्ल्यावर शिवजन्मोत्सव सोहळा : या शिवजयंती सोहळ्याची सुरूवात महाराष्ट्र गीताने केली जाणार आहे. त्यानंतर छत्रपती शिवाजी महाराज आग्र्यावरून कसे महाराष्ट्रात परतले याबाबतचे एक विशेष नाटक या ठिकाणी सादर करण्यात येत आहे. याबाबतची प्रशासनाने तयारी पूर्ण केलेली आहे. सुरक्षेसाठी पोलिसांचा मोठा फौज फाटा देखील तैनात करण्यात आलेला आहे. आता सगळ्यांचे लक्ष शिवजयंतीकडे सुरक्षितरित्या पार पडावी याकडे लागले आहे. राज्यात सर्वत्र शिवजयंतीची रेलचेल दिसून येत आहे. बाजारपेठा सजल्या असून ठिकठिकाणी विशेष कार्यक्रम आयोजित करण्यात आलेले आहेत.आजच्या दिवशी आग्र्याच्या किल्ल्यावर सायंकाळी सहा वाजता सोहळ्याला सुरुवात केली जाईल. सुरुवातीला स्वागत सोहळा त्यानंतर सुरेल गाण्यांची पर्वणी होणार आहे. हा अनमोल क्षण उपस्थित शिवभक्तांचे पारणे फेडणारा असणारा आहे. या कार्यक्रमासाठी आग्र्याच्या किल्ल्यात निमंत्रित पाहुण्यांसाठी किल्ला खास रात्री साडेनऊपर्यंत उघडा राहणार आहे.