बारामती - पुणे जिल्ह्यात पेट्रोल पंपांतील पेट्रोल आणि डिझेल चोरणाऱ्या आंतरराज्य टोळीतील तिघांना अटक करण्यात आली आहे. त्यांच्याकडून १ ट्रक,२ कॅन, मेटल कटर, पाईप, मोबाईल असा १६ लाख २८ हजारांचा मुद्देमाल जप्त करण्यात आला आहे. श्रीराम लाला काळे, दशरथ भीमा काळे, नाना गोविंद पवार अशी अटक केलेल्यांची नावे आहेत. जिल्ह्यात पंपावरील पेट्रोल आणि डिझेल चोरीचे प्रमाण वाढले होते. नुकतेच इंदापूर तालुक्यातील वडापुरी येथे साडेसात लाख रुपयांचे डिझेल तर लासुरणे येथे सव्वा लाख रुपयांचे डिझेल चोरट्यांनी चोरले होते. पंपामधून डिझेल चोरले जात असल्याने नागरिकांची देखील चिंता वाढली होती.मात्र पोलिसांनी ही टोळी जेरबंद केल्याने व्यवसायिकांना देखील दिलासा मिळणार आहे.
विशेष पथक नेमण्यात आले होते
पोलीस अधीक्षक अभिनव देशमुख यांनी स्थानिक गुन्हे अन्वेषण शाखेला यासंदर्भात विशेष पथक नेमून कारवाई करण्याचे आदेश दिले होते. त्यानुसार पोलिस निरीक्षक पद्माकर घनवट यांनी पथक तयार केले होते. या पथकाने इंधन चोरीबाबतच्या गुन्ह्यांची माहिती घेतल्यानंतर ट्रान्सपोर्ट व्यवसायातील टोळी पेट्रोल, डिझेल चोरी करीत असल्याचे स्पष्ट झाले होते. शिवाय, सर्व संशयित वारंवार ट्रकमधून माल घेऊन पुणे बाजूकडे येत असल्याचेही स्पष्ट झाले होते. त्यांच्यावर पाळत ठेवण्यात आली.
पेट्रोल पंपाची टेहळणी करताना अटक
विशेष पथकाला आरोपी तेरखेडा येथील असल्याची माहिती मिळाली होती. त्यानुसार पाहणी दरम्यान तेरखेडा येथील फाट्यावरील एका पंपाची टेहळणी करताना ३ जण दिसले. संशय आल्याने त्यांना ताब्यात घेऊन चौकशी केली. त्यांनी पुणे जिल्ह्यातील पंपावरून पेट्रोल, डिझेल चोरी केल्याची कबुली दिली. या आरोपींनी इंदापुर पोलीस ठाण्यातील दोन गुन्ह्यांसह वालचंदनगर पोलीस ठाण्यात दाखल करण्यात आलेल्या लासुर्णे, नातेपुते, अकलूज आदी ठिकाणच्या चोरलेल्या १७ हजार ७१८ लिटर डिझेलसह १३ लाख ४० हजार रुपये किंमतीच्या चोरीची कबुली दिली आहे.
हेही वाचा - नव्या कृषी कायद्यांमुळे शेतकरी संकटात - कृषी अर्थतज्ञ डी. नरसिंह रेड्डी
