पुणे - कोरोना संसर्गाच्या पार्श्वभूमीवर नववर्षाचे स्वागत यंदा साधेपणाने केले जाणार आहे. हॉटेल खुले ठेवण्यासाठी रात्री 10:45 वाजेपर्यंत वेळ दिलेली असल्याने रात्री 12 वाजता करण्यात येणारे सेलिब्रेशन आता नागरिकांना घरीच करावे लागणार आहे.
दरवर्षी होते गर्दी -
दरवर्षी पुणे शहरात धुमधडाक्यात नववर्ष साजरे केले जाते. काही दिवस आधीच त्याची तयारीही केली जाते. शहरातील फर्ग्युसन रोड, कॅम्प परिसर या भागात तरुण-तरुणी मोठ्या प्रमाणात सेलिब्रेशन करण्यासाठी येत असतात पण यंदा कोरोनाच्या पाश्वभूमीवर सर्वांना घरातूनच नववर्षाचे स्वागत करावे लागणार आहे.
हॉटेल व्यावसायिक हिरमुसले -
नववर्षाच्या स्वागतासाठी शहरातील हॉटेल व्यावसायिक दरवर्षी मोठ्या प्रमाणात पार्टीचे नियोजन करत असतात. विविध ऑफरही ठेवण्यात येत असतात पण यंदा 31 डिसेंबरला पुणे शहरात कोरोना संसर्गामुळे हॉटेल सुरू ठेवण्यासाठी रात्री 10:45 वाजेपर्यंतची वेळ दिलेली असल्याने हॉटेल व्यवसायिकांचा हिरमोड झाला आहे. आधीच लॉकडाऊनचा फटका त्यात आता नववर्षाच्या स्वागतासाठी लावण्यात आलेल्या निर्बंधांमुळे हॉटेल व्यावसायिकांना मोठ्या प्रमाणात फटका बसला आहे.
