पुणे - मोबाईल हिसकावणाऱ्या चोरट्यांचा प्रतिकार केल्याने तरुणावर चार जणांनी कोयत्याने वार केल्याची घटना घडली आहे. निगडी पोलीस ठाण्याच्या हद्दीतील थरमॅक्स चौक येथे ही घटना घडली. हेमंत बाबू तेलंगी (वय, २८) असे जखमी झालेल्या तरुणाचे नाव आहे.
हेही वाचा - पुण्यात शिवकालीन शस्त्रांचे प्रदर्शन, सह्याद्री प्रतिष्ठानचा उपक्रम
फिर्यादी हेमंत हे पहाटेच्या सुमारास थरमॅक्स चौक येथे थांबले होते. दुधाच्या कंपनीला लोकेशन पाठवत असताना पांढऱ्या रंगाच्या दुचाकीवरून आलेल्या चार जणांनी त्यांच्या जवळील मोबाईल हिसकावण्याचा प्रयत्न केला. त्यावेळी हेमंत यांनी चोरट्यांचा प्रतिकार केला. या दरम्यान झालेल्या झटापटीत झाली यात आरोपींनी हेमंत यांच्या हातावर कोयत्याने वार केले. हेमंत यांनी आरडाओरडा केल्यानंतर त्यांचे मित्र धावत आले. हे पाहून चार जणांनी त्या ठिकाणाहून पळ काढला. या प्रकरणी निगडी पोलीस ठाण्यात गुन्हा दाखल करण्यात आला आहे.
