पुणे - लोणावळ्याच्या भुशी धरणावर अडकलेल्या तरुणांचा जीव वाचवण्यात शहर पोलिसांना यश आले आहे. धरणाच्या पायऱ्यांवर बसून हे तरुण पाण्याच्या प्रवाहाचा आनंद घेत होते. तेवढ्यात अचानक पाण्याचा प्रवाह वाढला आणि हे सर्व जण अडकले. यानंतर स्थानिक नागरिकांनी आणि पोलीस प्रशासनाने त्यांना मदत करत सुखरूप बाहेर काढले.
लोणावळ्यातील भुशी धरण पर्यटनस्थळांपैकी एक आहे. येथे पावसाळ्यात हजारो पर्यटक दाखल होतात. अशातच शुक्रवारी काही हौशी तरुण मित्रांसह या धरणावर पाण्याचा आनंद घेण्यासाठी आले होते. हे सर्व जण भुशी धरणाच्या पायऱ्यांजवळील पाण्यात उतरले. त्यावेळी पाण्याचा प्रवाह कमी होत. मात्र, पाण्याचा प्रवाह अचानक वाढल्याने हे सर्व जण त्यात अडकले.
हे तरुण अडकल्याचे लक्षात येताच स्थानिक नागरिकांनी आणि लोणावळा शहर पोलिसांनी त्यांना जीवाची बाजी लावत वाचवले. यावेळी काही तरुणांना पाण्यात उड्या मारायला सांगून, धरणाच्या खालच्या बाजूला तैनात केलेल्या बचाव पथकाने त्यांना वाचवले.
हा सर्व प्रकार पर्यटकांपैकी एकाने आपल्या मोबाईलमध्ये कैद केला आहे. पोलीस निरीक्षक बी. आर. पाटील, सहायक पोलीस निरीक्षक स्वामी, पोलीस उपनिरीक्षक गायकवाड, आर. व्ही. मुंडे आणि पोलीस कॉन्स्टेबल मुंडे यांनी आपला जीव धोक्यात घालून या तरुणांना वाचविले.
