कोरेगाव भीमा : विजयस्तभांच्या शौर्यदिनाची मानवंदना घरातूनच देण्याचे स्थानिकांचे आवाहन

राज्यातील अनेक अनुयायी आता विजयस्तंभाला अभिवादन करण्यासाठी येत आहेत. मात्र, सध्या आपल्या देशावर कोरोनाचे मोठे संकट असल्याने 1 जानेवारीला आंबेडकर अनुयायांनी घरातूनच अभिवादन करण्याचे आवाहन स्थानिकांकडून करण्यात येत आहे.

पुणे - कोरेगाव भीमा येथे 1 जानेवारीला विजयस्तंभावर साजरा होणार शौर्य दिन, विधी व परंपरा जपत 50 जणांच्या उपस्थित साजरा होणार आहे. राज्यातील अनेक अनुयायी आता विजयस्तंभाला अभिवादन करण्यासाठी येत आहेत. मात्र, सध्या आपल्या देशावर कोरोनाचे मोठे संकट असल्याने 1 जानेवारीला आंबेडकर अनुयायांनी घरातूनच अभिवादन करण्याचे आवाहन स्थानिकांकडून करण्यात येत आहे.

कोरेगाव भीमाला विजयस्तंभावर 1 जानेवारीला शौर्यदिन असंख्य अनुयायांच्या उपस्थित साजरा केला जातो. मात्र, यंदाच्या वर्षी विजयस्तंभावर साजरा होणाऱ्या शौर्यदिनावर कोरोना महामारीचे संकट आहे. 14 एप्रिलची जयंती, नागपूर येथील दिक्षाभूमीलाही घरातूनच सलामी दिली आणि 6 डिसेंबरचा चैत्यभूमीवर न जाता घरातूनच मानवंदना दिली. त्याच धर्तीवर कोरेगाव भीमा येथील विजयस्तंभावर साजरा होणाऱ्या शौर्यदिनाला घरातूनच सलामी द्यावी, सध्या कोरोना महामारीचा प्रसार झपाट्याने वाढत आहे, या संकटावर मात करण्यासाठी भीमबांधव, भीमसैनिक, आंबेडकर अनुयायांनी घरातून शौर्यदिनाला सलामी देण्याचे आवाहन रिपब्लिक पक्षाचे शिरूर तालुकाध्यक्ष नवनाथ कांबळे यांनी केले.

विदर्भ, मराठवाड्यातून अनुयायांची हजेरी

1 जानेवारी 2021 रोजी साजरा होणाऱ्या शौर्यदिनाचा कार्यक्रम मर्यादित अनुयायांच्या उपस्थित साजरा होणार असल्याने विदर्भ, मराठवाड्यातून अनुयायी कोरेगाव-भीमा येथे येऊन सुरक्षित अंतर राखत, मास्कचा वापर करत मानवंदना देऊन परतीचा प्रवास करत आहेत.

पोलिसांचा कडक बंदोबस्त

कोरोनाच्या पार्श्वभूमीवर कोरेगाव-भीमा येथील विजयस्तंभावर शौर्यदिनाचा कार्यक्रम होत असताना या परिसरात गर्दी होऊन नये आणि विजयस्तंभावर येणाऱ्या अनुयायांकडून कोरोनाच्या नियमांची पायमल्ली होऊ नये, यासाठी पुणे ग्रामीण पोलिसांचा कडक बंदोबस्त तैनात आहे.