पुण्यात सलग दुसऱ्या दिवशी मुसळधार पाऊस, अनेक रस्ते जलमय

अनेक रस्ते जलमय झाल्याने मोठी वाहतूक कोंडी झाली. वारजे उड्डाणपुलाखाली अनेक वाहने बंद पडली. सिंहगड रस्त्यावर देखील अनेक ठिकाणी पाणी साचले. पर्वतीकडे जाणाऱ्या रस्त्यावर देखील मोठ्याप्रमाणावर पाणी साचले आहे.

पुणे - गेल्या दोन दिवसांपासून शहरात रात्रीच्या सुमारास मुसळधार पाऊस पडतो आहे. बुधवारी रात्री 8 च्या सुमारास जोरदार पावसाला सुरुवात झाली. २ तास कोसळलेल्या पावसामुळे अनेक रस्ते जलमय झाले.

बुधवारी रात्री ८ च्या सुमारास विजांच्या कडकडाटासह मुसळधार पावसाला सुरुवात झाली. पाऊस इतका जोरदार होता की, वाहनचालकांना समोरचे दिसणे देखील कठीण झाले होते. अनेक रस्ते जलमय झाल्याने मोठी वाहतूक कोंडी झाली. वारजे उड्डाणपुलाखाली अनेक वाहने बंद पडली. सिंहगड रस्त्यावर देखील अनेक ठिकाणी पाणी साचले. पर्वतीकडे जाणाऱ्या रस्त्यावर देखील मोठ्याप्रमाणावर पाणी साचले आहे. बिबवेवाडी, धायरी भागत अनेक ठिकाणी घरांमध्ये पाणी शिरले. नवीन कात्रज घाटाजवळ शेजारी बोगद्याजवळ रस्ता पावसामुळे बंद झाला होता. रस्त्यावर दरड कोसळली होती. कात्रजला दोन तासात 55 मिलिमीटर पावसाची नोंद झाली असून अजूनही शहरात पावसाचा जोर कायम आहे.