Gram Panchayat Election 2023 : अजित पवारांची काटेवाडीत प्रतिष्ठा पणाला, भाजपानं पाठिंबा दिलेल्या उमेदवाराला पराभूत करण्याचं आव्हान

Gram Panchayat Election 2023 : बारामती तालुक्यातल्या 31 ग्रामपंचायतींसाठी मतदान होणार आहे. एकूण 135 मतदान केंद्र असतील तर जवळपास 700 ते 750 कर्मचारी 31 ग्रामपंचायत निवडणूक केंद्रांवर असतील. दरम्यान, राज्यात अजित पवार हे शिंदे - फडणवीस सरकारसोबत सत्तेत गेले असले तरी ग्रामीण पातळीवर मात्र राष्ट्रवादी आणि भाजपाला विरोध कायम असल्याची परिस्थिती पहायला मिळत आहे.

बारामती Gram Panchayat Election 2023 : उपमुख्यमंत्री अजित पवार यांच्या गावात ग्रामपंचायत निवडणुकीची रंगत वाढत आहे. काटेवाडी या त्यांच्या गावी ग्रामपंचायत निवडणुकीत राष्ट्रवादी आणि भाजप समोरासमोर आल्याचं चित्र पाहायला मिळतंय. तसंच ग्रामस्थांमधून थेट सरपंच निवडला जाणार असल्यानं निवडणुकीतील रंगत वाढली आहे. काटेवाडी ग्रामपंचायतीत राष्ट्रवादी काँग्रेस आणि भाजपा पुरस्कृत पॅनल बरोबरच एका अपक्ष उमेदवाराचा देखील सरपंच पदासाठी अर्ज आल्यानं या निवडणुकीत चांगलीच चढाओढ बघायला मिळणार आहे.

यांच्यात होणार तिरंगी लढत : काटेवाडी ग्रामपंचायतीत एकूण 17 जागांसाठी ही निवडणूक लढवली जाणार आहे. तत्पूर्वी 17 जागांसाठी एकूण 118 इच्छुकांनी उमेदवारी अर्ज दाखल केले होते. त्यापैकी 71 अर्ज माघारी घेतले. तर सरपंच पदासाठी तब्बल 18 उमेदवारी अर्ज दाखल झाले होते. यापैकी तीन उमेदवारी अर्ज कायम राहिले असून उर्वरित अर्ज माघारी घेण्यात आले. काटेवाडी ग्रामपंचायतचे सरपंच पद यंदा अनुसूचित महिला प्रवर्गासाठी राखीव आहे. सरपंच पदासाठी राष्ट्रवादी काँग्रेस पुरस्कृत पॅनलच्या वतीनं मंदाकिनी दादा भिसे, भाजपा पुरस्कृत पॅनल कडून ज्योती बापू भिसे तर अपक्ष कमल बापू भिसे यांच्यामध्ये तिरंगी लढत रंगणार आहे.

थेट जनतेतून सरपंच निवडण्यात येणार : दरम्यान, यापूर्वी 2017 मध्ये काटेवाडी ग्रामपंचायतची निवडणूक झाली होती. तेव्हा प्रथम जनतेतून थेट सरपंच निवडण्यात आला होता. यावेळीदेखील सलग दुसऱ्यांदा काटेवाडी ग्रामस्थ थेट जनतेतून सरपंच निवडणार आहेत. विकासाच्या मुद्द्यावर राष्ट्रवादी काँग्रेस कडून ही निवडणूक बारामती हायटेक टेक्सटाईल पार्कच्या अध्यक्षा सुनेत्रा पवार यांच्या मार्गदर्शनाखाली लढवली जाणार. तर पुणे जिल्हा नियोजन समितीचे सदस्य पांडुरंग कचरे यांच्याकडून भाजप पुरस्कृत पॅनलची बांधणी करण्यात आली आहे. आदर्श ग्रामपंचायत असा नावलौकिक मिळवणाऱ्या काटेवाडी ग्रामपंचायत च्या निवडणुकीमध्ये विरोधकांकडून नेमके कोणते मुद्दे उपस्थित केले जाणार हे पाहणे औत्सुक्याचे ठरणार आहे.

हेही वाचा -