Pradeep Kurulkar Judicial Custody : प्रदीप कुरुलकर यांना 29 तारखेपर्यंत न्यायालयीन कोठडी; येरवडा कारागृहात होणार रवानगी

डीआरडीओ शास्त्रज्ञ प्रदीप कुरुलकर यांना अटक केल्यानंतर 9 तारखेपर्यंत एटीएस कोठडी देण्यात आली होती. आज (16 मे) कुरुलकर यांना न्यायालयात हजर करण्यात आले होते. यावेळी त्यांना 14 दिवसांची म्हणजेच 29 तारखेपर्यंत न्यायालयीन कोठडी देण्यात आली आहे. त्याचबरोबर कुरुलकर यांची येरवडा कारागृहात रवानगी करण्यात आली आहे. हनीट्रॅपमध्ये अडकून गोपनीय माहिती पाकिस्तानला दिल्याने कुरुलकर यांना अटक करण्यात आली होती.

पुणे : डीआरडीओचे संचालक प्रदीप कुरुलकर यांच्या अडचणींमध्ये दिवसेंदिवस वाढ होत आहे. त्यांच्याबाबतील तपासात अनेक नवीन गोष्टी समोर येत आहेत. पुण्यातील संरक्षण संशोधन संस्थेचे (डीआरडीओ) संचालक प्रदीप कुरुलकर यांनी हनीट्रॅपमध्ये अडकवून पाकिस्तानला माहिती दिल्याचा आरोप आहे. त्यांना एटीएसकडून अटक करण्यात आली होती. आज कुरुलकर यांना न्यायालयात हजर करण्यात आले होते. यावेळी त्यांना 14 दिवसांची म्हणजेच 29 तारखेपर्यंत न्यायालयीन कोठडी देण्यात आली आहे. कुरुलकर यांची येरवडा कारागृहात रवानगी करण्यात आली आहे.

येरवडा कारागृहात रवानगी: पुण्यातील संरक्षण संशोधन संस्थेचे (डीआरडीओ) संचालक प्रदीप कुरुलकर यांना 2 मे रोजी अटक करण्यात आली होती. कुरुलकर यांना अटक केल्यानंतर 9 तारखेपर्यंत एटीएस कोठडी देण्यात आली होती. त्यानंतर 9 तारखेला त्यांना पुण्यातील शिवाजी नगर येथील न्यायालयात हजर करण्यात आले होते. यावेळी त्यांना 15 तारखेपर्यंत एटीएस कोठडी देण्यात आली होती. कुरुलकर यांना सोमवारी न्यायालयात हजर करण्यात आले होते. त्यांना एक दिवसाची एटीएस कोठडी देण्यात आली होती. आज त्यांना न्यायालयात हजर करण्यात आले आणि तेव्हा न्यायालयाने कुरुलकर यांना 29 तारखेपर्यंत न्यायालयीन कोठडी सुनावली आहे. आत्ता कुरुलकर यांची येरवडा कारागृहात रवानगी झाली आहे.

कोठडीत आवश्यक औषधे पुरवा : आज न्यायालयात कुरुलकर यांना हजर केल्यानंतर त्याचे वकील यांच्याकडून मागणी करण्यात आली की, कुरुलकर यांना हेवी शुगर असून त्यांना न्यायालयीन कोठडीत आवश्यक औषधे पुरविण्यात यावी. यावर न्यायालयाने त्यांना परवानगी दिली आहे. तसेच याआधीही डीआरडीओचे संचालक डॉ. प्रदीप कुरुलकर देशाच्या दृष्टीने अत्यंत संवेदनशील माहिती पाकिस्तानला पुरवल्याच्या आरोपाखाली तुरूंगात होते. त्यांना १५ मेपर्यंत एटीएस कोठडी देण्यात आली होती. या प्रकरणी त्यांची पोलिग्राफी टेस्ट केली जाणार आहे.

काय आहे अटकेमागची कहाणी- पाकिस्तानी एजंटच्या हनीट्रॅपमध्ये कुरुलकर कसे अडकले याची रंजक माहितीच एटीएसने दिली आहे. अनेक प्रकरणांप्रमाणेच, पाकिस्तानी हेरांनी कुरुलकर यांच्याशी सोशल मीडियाद्वारे संपर्क साधला. त्यांचा विश्वास संपादन केल्यावर त्यांना खासगी फोटो आणि व्हिडिओ शेअर करण्याची लालच दाखववून त्यांची फसवणूक केली. हनी ट्रॅपचा भूलभुलैया भल्या-भल्यांना अडकवण्यास कारणीभूत ठरल्याची अनेक उदाहरणे आहेत. असे म्हणतात की बाई, बाटली आणि जुगार माणसाला आयुष्यातून उठवतो. कुरुलकर यांच्या बाबतीतही आमिषाला बळी पडून त्यांचा गेम करण्यात आला असेच म्हणावे लागेल.

कुरुलकर यांना केले ब्लॅकमेल - कुरुलकर यांनीही त्यांचे वैयक्तिक खासगी फोटो एजंटांना पाठवले. त्यातच कुरुलकर फसत गेले. त्यांच्या खासगी फोटो आणि व्हिडिओचा वापर करून कुरुलकर यांना हळूहळू ब्लॅकमेल करण्यात आले. त्यातूनच त्यांना संवेदनशील संरक्षण माहिती शेअर करण्यास पाकिस्तानी एजंटांनी भाग पाडले. सोशल मीडियावरुन शेअर केलेल्या गोष्टींचा वापर ब्लॅकमेल करण्यासाठी होत आहे. कुरुलकर यांनाही याच माध्यमातून ब्लॅकमेल करण्यात आले. त्यामुळे अशा माहिती, फोटो, व्हिडिओ शेअर करताना त्याचा दुरुपयोग होऊ शकतो. एवढेच नाही तर ब्लॅकमेल करण्यासाठी त्याचा सहज उपयोग होऊ शकतो हेही यातून स्पष्ट झाले आहे.

हेही वाचा -