कोरोनाग्रस्त आईचा उपचारादरम्यान मृत्यू; मंचरमध्ये मुलाकडून डॉक्टरांना मारहाण

कोरोनाबाधित वयोवृद्ध महिलेचा उपचारादरम्यान मृत्यू झाल्याची घटना मंचर ग्रामीण रुग्णलयात घडली. मात्र, त्याचा राग धरत मृत महिलेच्या मुलाने डॉक्टरांना मारहाण केल्याचा प्रकार समोर आला आहे.

पुणे - मंचर येथील ग्रामीण रुग्णालयात कोरोनावर उपचार घेत असलेल्या एका महिलेचा मृत्यू झाला. या घटनेची माहिती तिच्या मुलांना दिली असता, त्या मुलांसह अन्य दोघांनी मिळून डॉक्टरांना मारहाण केल्याची घटना शनिवारी घडली. या मारहाणीचा संपुर्ण प्रकार सीसीटीव्ही कॅमेऱ्यात कैद झाला आहे. या प्रकरणी मंचर पोलिसांत मुलासह दोघांवर गुन्हा दाखल करण्यात आला असल्याची माहिती पोलीस निरीक्षक कृष्णाकांत खराडे यांनी दिली.

कोरोनाग्रस्त रुग्नांचे प्राण वाचविण्यासाठी डॉक्टर आरोग्य कर्मचारी कोव्हिड योद्धे म्हणुन दिवस रात्र आपल्या जीवाची पर्वा न करत काम करत आहेत. मात्र, अद्यापही कोरोनावर लस उपलब्ध नसल्याने काही रुग्ण या महामारीचे बळी ठरत आहेत. अशाच प्रकारे मंचरच्या ग्रामीण रुग्णालयात एक ६५ वर्षीय कोरोना बाधित वयोवृद्ध महिला उपचार घेत होती. मात्र, तिचा उपाचारा दरम्यान मृत्यू झाला. यावेळी रुग्णालयाकडून मृत महिलेच्या मुलास या घटनेची फोनवरून माहिती देण्यात आली.

आईच्या मृत्यूची माहिती मिळताच मृत महिलेच्या मुलाने मंचर ग्रामीण रुग्नालयाचे वैद्यकीय आधिकारी डॉ. महेश नारायण गुडे यांना फोनवरुन शिवीगाळ केली. तसेच दोन सहकाऱ्यांसमवेत रुग्नालयात येऊन डॉ. महेश गुडे यांनी लाथा बुक्क्यांनी मारहाणही केली. यावेळी रुग्णालयातील कर्मचाऱ्यांनी मध्यस्थी करत डॉ. गुडे यांना वाचविले. मात्र, मृताच्या नातेवाईंकाकडून शिवीगाळ सुरूच होती. हाणामारीचा हा संपूर्ण प्रकार सीसीटीव्ही कॅमेऱ्यात कैद झाला आहे. या घटनेनंतर डॉक्टरांना मारहाण करणाऱ्या विरोधात नागरिकांमधून संताप व्यक्त करण्यात येत आहे.

या मारहाण प्रकरणी डॉ. गुडे यांनी मंचर पोलीस ठाण्यात तक्रार दाखल केली. त्यानंतर मृत महिलेच्या मुलासह इतर दोघांवर गुन्हा दाखल झाला आहे.