पुणे - पिंपरी-चिंचवड पोलिसांनी एका सराईत गुन्हेगाराला व्हॉट्सअप ग्रुपच्या मदतीने गुजरातमधून अटक केली आहे. ही कारवाई गुन्हे शाखा एकने केली. रोहित ऊर्फ कालू दलपत घमंडे (वय ३० रा.गुजरात) असे अटक करण्यात आलेल्या आरोपीचे नाव आहे. त्याच्यावर विविध राज्यात पाच गुन्हे दाखल आहेत. अद्याप, चार साथीदार फरार असून त्यांचा शोध पोलीस घेत आहेत.
पोलिसांनी दिलेल्या माहितीनुसार, तक्रारदार रवी अमिचंद मेहता (वय ७१) हे सोने आणि चांदीचा व्यवसाय करतात. ते मूळ पंजाब येथील असून महाराष्ट्र, पंजाब, राजस्थान, गुजरात येथील सोने व्यावसायिक दुकानदाराकडे जावून सोन्याचे आणि चांदीचे दागिने विकण्याचा व्यवसाय करतात. डिसेंबर महिन्यात ते सोन्याचे दागिने आणि रोख रक्कम घेऊन सकाळी पिंपरीच्या आंबेडकर चौकातून जात असताना दुचाकीवरून आलेल्या दोघांपैकी एकाने मेहता यांच्या हातातील बॅग हिसकावून पळ काढला. या घटनेत रवी मेहता हे जखमी झाले होते. भरदिवसा त्यांचा पाठलाग करून लुटण्यात आले होते. घटनेत सोने, चांदीचे दागिने रोख रक्कम असा एकूण ७ लाख रुपयांचा ऐवज लंपास करून धूम ठोकली होती. दरम्यान हा प्रकार सीसीटीव्हीत कैद झाला त्यानुसार तपास सुरू होता. मात्र, सीसीटीव्ही फुटेज आणि फोटो 'महाराष्ट्र क्राईम डिटेक्शन' व 'नॅशनल क्राईम डिटेक्शन ग्रुप'वर पोस्ट करण्यात आला होता.
हेही वाचा - 'कृत्रिम बहुमताच्या जोरावर सत्ताधारी लोकशाहीचा खून पाडतायत'
गुन्हे शाखा एकच्या अधिकारी आणि कर्मचारी यांना माहिती मिळाली, की संबंधित आरोपी हा गुजरात येथील आहे. त्यानुसार एक पथक तयार करून गुजरातमधील अहमदाबाद शहरात गेले. घटनेची स्थानिक पोलिसांना माहिती देण्यात आली आणि अहमदाबाद गुजरात येथील छारानगर, कुबेरनगर येथे सापळा रचून सराईत गुन्हेगार रोहित ऊर्फ कालू दलपत घमंडे याला अटक करण्यात आली.
हेही वाचा - वर्गमित्रांनीच विद्यार्थ्याला बदडले, वर्गात प्रश्नांची उत्तरे देतो म्हणून मारहाण केल्याचा आरोप
दुसऱ्या घटनेत पिंपरीमध्ये मित्रांकडून उसणे पैसे घेऊन मुलाची शाळेची फी भरण्यासाठी जात असलेल्या एका ब्रेझा गाडी चालकास, तुमच्या गाडीचा धक्का लागला आहे, असे कारण सांगत गाडीतून खाली उतरून त्याच्यांशी हुज्जत घातली आणि सोबत असलेल्या साथीदारांनी गाडीची डाव्या बाजूची काच फोडून सीटवर ठेवलेले ३ लाख रुपये पळवले होते, अशी कबुली आरोपीने दिली आहे.