कोरोनाच्या तिसऱ्या लाटेचा सामना.. पिंपरी-चिंचवडमध्ये लहान मुलांसाठी कोविड हॉस्पिटल

पिंपरी-चिंचवड शहरातील कोरोनाचा दुसरी लाट ओसरत आहे. मात्र, तिसऱ्या लाटेची शक्यता तज्ज्ञांनी वर्तवली असून यात लहान मुलांना बाधा होण्याची शक्यता व्यक्त केली जात आहे. याच पार्श्वभूमीवर पिंपरीतील नवीन जिजामाता रुग्णालयात 50 बेडचे लहान मुलांचे कोविड केअर सेंटर तयार करण्यात आले आहे.

पुणे/ पिंपरी-चिंचवड - पिंपरी-चिंचवड शहरातील कोरोनाचा दुसरी लाट ओसरत आहे. मात्र, तिसऱ्या लाटेची शक्यता तज्ज्ञांनी वर्तवली असून यात लहान मुलांना बाधा होण्याची शक्यता व्यक्त केली जात आहे. याच पार्श्वभूमीवर पिंपरीतील नवीन जिजामाता रुग्णालयात 50 बेडचे लहान मुलांचे कोविड केअर सेंटर तयार करण्यात आले आहे. त्यात, लहान मुलांच्या मनोरंजनासाठी इनडोअर गेम देखील आहेत. रुग्णालयात बालरोग तज्ञ डॉक्टरांची टीम देखील असणार आहे, अशी माहिती वैद्यकीय अधिकारी बाळासाहेब होडगर यांनी दिली आहे.

पिंपरी-चिंचवड शहरातील कोरोनाबाधित रुग्णांची संख्या ओसरत आहेत. परंतु, तिसऱ्या लाटेची चिंता नागरिकांना सतावत आहे. कारण, तिसऱ्या लाटेत लहान मुलांना बाधा होणार असल्याचे तज्ज्ञाकडून सांगण्यात आले आहे. याच पार्श्वभूमीवर पिंपरीमध्ये नवीन जिजामाता रुग्णालयात लहान मूलांसाठी कोविड केअर सेंटर तयार करण्यात आले असून लहान मुलांच्या मनोरंजनासाठी खेळणी, कॅरम, एबीसीडी, वेगवेगळे कार्टून्स स्टिकर लावण्यात आले आहेत.

दरम्यान, उपचार घेण्यासाठी आलेल्या लहान मुलांच्या पालकांसाठी वेगळी व्यवस्था करण्यात आली आहे. जर, त्यांना त्रास होत असेल त्यांच्यावर उपचारासाठी 50 बेड उपलब्ध केले आहेत. परंतु, नागरिकांनी कोरोना काळातील नियमांचे पालन केल्यास प्रत्येक लहान मूल सुरक्षित राहतील आणि तिसरी लाट येणारच नाही यासाठी नागरिकांनी प्रयत्न केला पाहिजे.