पुणे - ससून रुग्णालयामध्ये उपचारासाठी येणाऱ्या रुग्णांवर योग्यरित्या उपचार केले जात नाही. रुग्णांच्या संपर्कात येणाऱ्या नातेवाईकांना क्वारंटाईन केले जात नाही. कमी-जास्त झाले तर रुग्णाला इतर रुग्णालयात जाण्यास सांगतात. लॉकडाऊन होऊन 19 दिवस झाले तरी ससून प्रशासनाला 11 मजली इमारत तयार असताना आयसोलेशन कक्ष तयार करता आले नाही. आपली जबाबदारी दुसऱ्या रुग्णालयावर टाकण्याचे काम हे रुग्णालय करत आहे, असा आरोप पुणे महापालिकेचे काँग्रेस गटनेते अरविंद शिंदे यांनी केला.
कोरोनाबाधित रुग्णांकडे ससून रुग्णालयाचे 'डिन' व्यवस्थित लक्ष देत नाहीत. ससून रुग्णालय प्रशासन पुणेकरांच्या जीवाशी खेळत आहे. ससून रुग्णालयाचे डिन अजय चंदनवाले यांना समज देऊन तातडीने उपाययोजना करण्यात याव्या, अन्यथा त्यांच्यावर आपत्ती व्यवस्थापन कायद्याअंतर्गत कारवाई तरी करण्यात यावी, अशी मागणी अरविंद शिंदे यांनी केली.सुरुवातीपासूनच ससून रुग्णालयात कोरोनाबाधित रुग्णांची योग्य ती काळजी घेत नसल्याचा आरोप केला जात आहे. पुण्यात आतापर्यंत 31 कोरोनाबाधित रुग्णांचा मृत्यू झाला आहे. त्यात सर्वाधिक 23 ससून रुग्णालयातील रुग्णांचा मृत्यू झाला आहे.पुण्यात कोरोनाचे रुग्ण काही कमी होत नसल्याचे चित्र आहे. हा आकडा आता 282 वर गेला आहे. दाटीवाटीने असलेल्या भवानी पेठ आणि कसबा मतदारसंघात कोरोनाचे रुग्ण वाढतच आहेत. पुणे शहरात 237, पिंपरी - चिंचवडमध्ये 31 तर, ग्रामीण भागात 12 असे 282 कोरोनाचे रुग्ण आहेत. पुणे महापालिकेच्या नायडू रुग्णालयात 11, ससूनमध्ये 2, रुबी आणि एएफएमसी रुग्णालयात 1 कोरोनाचा पॉझिटिव्ह रुग्ण आढळून आला. आज सायंकाळी 5 वाजेपर्यंत 282 कोरोनाचे रुग्ण आहेत. तर आज दिवसभरात 2 महिलांचा कोरोनामुळे मृत्यू झाला.
