पुणे - महावितरण, महापारेषण आणि महानिर्मिती कंपनीतील कंत्राटी कामगारांनी मंगळवारपासून काम बंद आंदोलन केले आहे. कर्मचाऱ्यांच्या विविध मागण्यासंदर्भात कंपनी व्यवस्थापना बरोबर चर्चा निष्फळ झाल्याने वीज कामगार संघाच्या कंत्राटी कामगारांनी हे राज्यव्यापी बेमुदत काम बंद आंदोलन सुरू केले. या बंदमध्ये राज्यातील सुमारे 22 हजार कंत्राटी कामगार सहभागी झाले आहेत .
कंपनीतील कंत्राटी कामगारांच्या रोजगार आणि अन्य विविध समस्यांना घेऊन महाराष्ट्र वीज कंत्राटी कामगार संघाने कंपनीने व्यवस्थापनाशी चर्चा केली होती. मात्र, त्यातून कोणताच मार्ग निघाला नाही. त्यानंतर पुण्यातील रास्ता पेठ येथील महावितरणच्या कार्यालयासमोर या कंत्राटी कामगारांनी सरकार विरोधात घोषणा देऊन बंद आंदोलन सुरू केले.
या आहेत मागण्या-
- कंत्राटदार विरहित शास्वत रोजगाराची हमी आणि सुरक्षा कंपनीने द्यावी
- चालू भरती प्रक्रियेत बदल व्हावेत
- भरतीमध्ये वर्षानुवर्षे रिक्त पदांवर काम करणाऱ्या अनुभवी कंत्राटी कामगारांना प्राधान्य मिळावे
अशा प्रमुख मागण्या संघटन मंत्री राहुल बोडके यांनी यावेळी संघटनेच्या वतीने केल्या आहेत. प्रशासनाकडून फक्त चर्चा केली जात आहे, कोणतेही ठोस आश्वासन आम्हाला देण्यात येत नाही. जॉब सेक्युरिटी हा जो महोत्त्वाचा विषय आहे त्याबाबत काहीच बोलायला तयार नाही. जो पर्यंत जॉब सेक्युरिटीचा विषय मान्य होत नाही तो पर्यंत आम्ही आंदोलन चालूच ठेऊ असा इशाराही राहुल बोडके यांनी यावेळी दिला.
