पुणे : पुण्यात आज पक्षीय बैठकीसाठी बावनकुळे पुण्यात आले होते. त्यावेळी ते माध्यमांशी बोलत होते. पुण्यात आज आम्ही या बैठका संपूर्ण २८८ विधानसभा मतदार संघात घेत आहोत. आम्ही घर चलो अभियान राबवत आहोत. पक्ष संघटनेचे काम मजबूत करण्याचा हा प्रयत्न आहे, असे बावनकुळे म्हणाले आहेत. पवारांच्या राजीनामा नाट्यवर बोलतांना म्हणाले, यात भाजपचा कुठलाही डाव नव्हता. अजित पवार यांचा मागच्या चार महिन्यापासून माझा संपर्क झाला नाही, ते आमच्या कुठल्याही नेत्याच्या संपर्कात नाहीत, हेच मी सांगत होतो.
मोदींच्या नेतृत्वात कर्नाटक जिंकू : त्यांच्या महाविकास आघाडीकडूनच अजित पवारांना टार्गेट केले जात आहे. राष्ट्रवादी काँग्रेसमध्ये जे काही तीन दिवस झाले, ती सगळी स्क्रिप्ट होती. राष्ट्रवादीचा तीन दिवसांचा खेळ म्हणजे नौटंकी आणि घरगुती तमाशा होता, असेही ते म्हणाले आहेत. कर्नाटक निवडणुकीवर बोलतांना कर्नाटकात भाजपला निवडून येण्यासाठी कुणाचीही गरज नाही. मोदींच्या नेतृत्वात आम्ही कर्नाटक जिंकू. तिथे भाजपचे सरकार येईल. मराठी भाषेला आणि मराठी माणसाला न्याय देण्याची आमची भूमिका कायम आहे. पक्ष आणि पक्षाचा नेता आमच्यासाठी महत्त्वाचा आहे, असे बावनकुळे म्हणाले आहेत.
प्लॅन बीची गरज नाही : सत्ता संघर्षावर बोलतांना निकाल येऊ द्या, आम्हाला प्लॅन बीची गरज नाही. यांनी बहुमत सिद्ध करावे. आमच्याकडे १८४ च्यावर बहुमत आहे. आमचे सरकार नक्की टिकेल, असे ते म्हणाले आहेत. सामना आग्रलेखावर त्यांनी जोरदार टीका केली आहे. त्यावर बोलताना लोकशाही पहायची असेल, तर भाजपाकडे बघा. दुसऱ्या पक्षात लोकशाही नाही केवळ घराणेशाही आहे. त्यांना दुसऱ्याला मोठे करायचे नाही. हे आपला पक्ष दुसऱ्याला देवू शकत नाहीत.
पक्ष टिकवण्यासाठी नौटंकी : शरद पवार हे शेवटपर्यंत पक्षाचे अध्यक्ष राहतील. पक्ष टिकवण्यासाठी ही सगळी नौटंकी आहे, असे ते बावनकुळे म्हणाले आहेत. शरद पवारांचा पक्ष हा साडेतीन जिल्ह्याचा असल्याची टीका देवेंद्र फडवणीस यांनी केली. त्यानंतर शरद पवारांनी जोरदार उत्तर देत आज मी निपाणी येत आहे, असे म्हटले होते. या दोघांच्या होणाऱ्या टीकांवर प्रतिक्रिया देताना चंद्रशेखर बावनकुळे म्हणाले, शरद पवार हे महाराष्ट्राचे मोठे नेते आहेत. त्यांनी फडणवीससारख्या कार्यकर्त्यांवर असे काही बोलू नये, असे म्हटले आहे.
