पुणे - कोरोना विषाणूने चीनमध्ये थैमान घातले आहे. हा विषाणू भारतात पसरू नये, यासाठी लष्कर सज्ज असल्याचे वक्तव्य लष्करप्रमुख मनोज नरवणे यांनी केले. हा विषाणू रोखण्यासाठी आवश्यक सर्व उपाययोजना केल्या जात असल्याची माहिती त्यांनी दिली. या रोगाशी सामना करण्यासाठी सर्वांनी एकत्र येण्याची गरज असल्याचेही ते यावेळी म्हणाले.
हेही वाचा - चीनमधून ३२४ भारतीय दिल्लीत दाखल, वैद्यकीय तपासणी सुरू
लष्करी अभियांत्रिकी सेवेत महत्त्वपूर्ण कामगिरी बजावणाऱ्या पुण्यातील खडकी येथील 'बॉम्बे सैर्पस' संस्थेच्या स्थापनेला शनिवारी २०० वर्ष पूर्ण झाले. यानिमित्ताने आयोजित समारोप सोहळ्याला त्यांनी उपस्थिती लावली होती. लष्करप्रमुखांसह लेफ्टनंट जनरल मायकल मॅथ्यू, लेफ्टनंट जनरल संजीव कुमार श्रीवास्तव, ब्रिगेडिअर एम. जी. कुमार यांनी शहीद स्तंभाला पुष्पचक्र अर्पण करून आदरांजली वाहिली.
हेही वाचा - कोरोनाचा कहर : चीनमध्ये २४ तासात आणखी ४६ मृत्यू, बळींची संख्या २५९ वर..
'युद्धाचे बदलते स्वरूप लक्षात घेता यामध्ये अभियंत्यांची भूमिका महत्त्वपूर्ण असणार आहे. भविष्यातील युद्ध हे अधिक तांत्रिक असणार आहे. त्यामुळे लष्करातील अभियंत्यांनी अत्याधुनिक तंत्रज्ञान आत्मसात करण्यासह त्याचा वापर करणे आवश्यक आहे. देशाच्या सीमावर्ती भागात पायाभूत सुविधा निर्माण करण्याची प्रक्रिया निरंतर सुरूच राहणार आहे, असे प्रतिपादन यावेळी नरवणे यांनी केले.
हेही वाचा - ...म्हणून न्यायाधीश बदलावा, अश्विनी बिद्रे-गोरेंच्या पतीचा साक्ष देण्यास नकार
जवानांचे दिमाखदार संचलन
या कार्यक्रमात जवानांचे पथसंचलन आयोजित करण्यात आले होते. यामध्ये लष्करी अभियांत्रिकी तुकडीचे जवान, शीख आणि मराठा लाईट इन्फंट्रीच्या ६ तुकड्या सहभागी झाल्या होत्या. कार्यक्रमाच्या सुरुवातीला लष्करप्रमुख मनोज नरवणे यांनी पथसंचलनाची मानवंदना स्वीकारली. त्यानंतर त्यांनी संचलनाची पाहणी केली. यावेळी लष्करी जवानांनी दिमाखदार संचलन करत उपस्थितांची मने जिंकली. याप्रसंगी सुखोई-३० या लढाऊ विमानाने सलामी देत प्रात्यक्षिके सादर केले.
