पुणे - गेल्या अनेक दिवसांपासून अभिनेता डॉ. अमोल कोल्हे यांनी शिवसेना का सोडली? या प्रश्नाची चर्चा शिरूर लोकसभा मतदार संघात सुरू आहे. मात्र, प्रचाराच्या सांगता सभेत आज स्वतः डॉ. कोल्हेनी गौप्यस्फोट केला. मी शिवसेनेत असताना मला सातारा लोकसभा मतदारसंघातून छत्रपती उदयनराजे भोसले यांच्या विरोधात लोकसभेची निवडणूक लढवावी, असा आग्रह धरला जात होता. मात्र, छत्रपतींच्या गादीशी कधीच गद्दारी करणार नाही ही भावना मनात धरून बाहेर पडलो, असल्याचे ते म्हणाले.
शिरूर लोकसभा मतदारसंघावर गेल्या १५ वर्षांपासून शिवसेनेचे खासदार शिवाजी आढळराव पाटील यांनी जनमानसात एक वेगळे स्थान निर्माण केले होते. आता राष्ट्रवादी काँग्रेसने स्वराज्य रक्षक संभाजी मालिकेतील अभिनेता डॉ. अमोल कोल्हे यांना आढळरावांच्या विरोधात मैदानात उभे उतरवले आहे. शिरूर लोकसभेची लढाई सुरू झाली तेव्हापासून भाजप-सेना युतीकडून शिरूर लोकसभा मतदारसंघात १३ मंत्र्यांच्या सभा झाल्या. तर, राष्ट्रवादी काँग्रेसकडून प्रत्येक नेत्यांनी संपूर्ण मतदारसंघ पिंजून काढला. या प्रचार दौऱ्यामध्ये राष्ट्रवादीकडून विमानतळ, बैलगाडा शर्यत बंदी, पुणे-नाशिक महामार्गांवरील वाहतूक कोंडी या प्रमुख मुद्द्यांना लक्ष्य करण्यात आले.
शिरूर लोकसभा मतदारसंघात आरोप-प्रत्यारोपाच्या फैरी मतदार राजाने अनुभवल्या. मात्र, हा मतदार राजा हुशार झाला आहे. तो निश्चितच चांगल्या उमेदवाराला आपला खासदार बनवेल यात शंका नाही.
मावळ गोळीबार प्रकरणात दोषी आढळल्यास देशात कुठल्याही चौकात फाशी द्या - अजित पवार
मावळ गोळीबार प्रकरणांमध्ये अजित पवार यांचा हात असल्याचे आरोप गेल्या अनेक दिवसांपासून सुरू आहे. देशात आणि राज्यात सरकार तुमचे आहे. कितीही आणि कशीही चौकशी करा. या चौकशीत दोषी आढळलो तर देशातल्या कुठल्याही चौकात मला फाशी द्या, असे अजित पवार म्हणाले. मात्र, हे आरोप खोटे निघाले तर आरोप करणाऱ्यांना फाशी द्यावी लागेल, असे वक्तव्य शिरूर लोकसभा मतदार संघाच्या सांगता सभेत अजित पवारांनी केले.
