खेड ( पुणे ) - भारतासह संपूर्ण जगाला वेठीस धरलेल्या कोरोना महामारीला, पुणे जिल्ह्यातील ४८ गावांनी पहिल्या आणि दुस-या लाटेत देखील आपल्या गावात शिरकाव करू दिला नाही. या गावांमध्ये आतापर्यंत एकही कोरोनाचा रुग्ण सापडला नाही. यातील बहुतेक सर्व गावे दुर्गम भागातील आहेत. दरम्यान जिल्ह्यातील ४४२ ग्रामपंचायती आज अखेर कोरोना मुक्त झाल्या आहेत.
४८ गावांनी कोरोनाला रोखले वेशीवरच
राज्यातील पहिला कोरोना रुग्ण पुणे जिल्ह्यात ९ मार्च २०२० रोजी सापडला, आणि प्रशासकीय यंत्रणा खडबडून जागी झाली. त्यानंतर एक महिन्यातच कोरोनाचा प्रादुर्भाव शहरी भागातून ग्रामीण भागात ही पसरला. त्यानंतर पहिल्या लाटेत सप्टेंबर-ऑक्टोबर महिन्यात, संपूर्ण ग्रामीण भागात कोरोना महामारीची लागण झाली. तर कोरोनाच्या दुस-या लाटेत तर हजारो गावे कोरोनाच्या विळख्यात सापडली. पहिल्या आणि दुसर्‍या लाटेमध्ये मिळून, पुणे जिल्ह्यातील १३५५ ग्रामपंचायतींमध्ये कोरोनाची बाधा झाली. तरी देखील ४८ गावांनी कोरोनाला वेशीवरच रोखले. कोरोना ची दुसरी लाट ओसरत असल्याने हळूहळू गावे देखील कोरोना मुक्त व्हायला सुरुवात झाली आहे.
दोन लाख साठ हजार कोरोनाबाधित रुग्ण
जिल्ह्यातील ग्रामीण भागामध्ये आतापर्यंत दोन लाख साठ हजार कोरोना बाधित रुग्ण आहेत. त्यातील दोन लाख एकवीस हजार सहाशे त्रेपन्न रुग्णांना बरे झाल्यामुळे घरी सोडण्यात आले आहेत. सद्यस्थितीत तीस हजारापेक्षा जास्त रुग्ण उपचार घेत आहेत. जिल्ह्यात सर्वाधिक बाधित रुग्ण हवेली तालुक्यातील असून त्यांची संख्या साठ हजार पर्यंत गेली आहे, तर तीस हजार रुग्ण खेड तालुक्यात आहेत. दाखल रुग्णांची संख्या खेड तालुक्यात ४ हजारापेक्षा जास्त सोडून जिल्ह्यातील इतर तालुक्याच्या तुलनेत सर्वाधिक असल्याची माहिती जिल्हा परिषदेचे मुख्य कार्यकारी अधिकारी आयुष प्रसाद यांनी दिली.
हेही वाचा- चंद्रपूरमध्ये काल 644 कोरोनामुक्त; 110 नवीन भर, 9 मृत्यू
