परभणी - दिल्ली येथील निजामुद्दीन भागात तबलिगी जमातच्या धार्मिक कार्यक्रमात सहभागी झालेल्या परभणी शहरातील 3 व्यक्तींचा 'कोरोना' विषाणुच्या तपासणीचा अहवाल निगेटिव्ह आला आहे. त्यांना जिल्हा रुग्णालयातील विलगीकरण कक्षात दाखल करण्यात आले होते. दरम्यान, त्यांच्या संपर्कात आलेल्या जिल्ह्यातील 5 ठिकाणच्या 5 व्यक्तींना त्यांच्या घरी होम-क्वारंटाईन करून त्यांचेही 'स्वॅब' नमुने तपासणीसाठी पाठविण्यात आले आहेत. त्याचा अहवाल आज रात्री किंवा उद्या सकाळी प्राप्त होणार असल्याची माहिती जिल्हाधिकारी दीपक मुगळीकर यांनी माध्यमांना दिली आहे.
कोरोनाने संपूर्ण जगात दहशत निर्माण केली आहे. त्याचप्रमाणे भारतात सर्वाधिक रुग्ण महाराष्ट्रात असल्यामुळे चिंता अधिक प्रमाणात आहे. असे असले तरी परभणीत मात्र अद्याप एकही कोरोनाग्रस्त रुग्ण सापडलेला नाही. परंतु दिल्ली येथील निजामुद्दीन भागात तबलिगी जमातच्या धार्मिक कार्यक्रमात सहभागी झालेल्या व्यक्तींना मोठ्या संख्येने कोरोनाची लागण झाल्याची बाब पुढे आल्याने देशात खळबळ उडाली. विशेष म्हणजे परभणी शहरातील 3 जण या कार्यक्रमात सहभागी झाल्याचे निष्पन्न झाले. ते तिघे परभणीत 13 मार्च रोजी आले होते. त्या व्यक्तींना परभणीच्या जिल्हाधिकाऱ्यांनी दिलेल्या आदेशानुसार, त्यांच्या घरून ताब्यात घेऊन जिल्हा रुग्णालयात विलगीकरण कक्षात दाखल करण्यात आले होते. मंगळवारीच त्यांच्या घशातील 'स्वॅब'चे नमुने तपासणीसाठी घेण्यात आले. ते पुणे येथे पाठविण्यात आले होते. त्याचा अहवाल आज (गुरुवारी) सकाळीच जिल्हा प्रशासनाला प्राप्त झाला. या तिघांच्याही तपासण्या निगेटिव्ह असून कोणालाही कोरोना झाला नसल्याचे स्पष्ट झाल्याची माहिती मुगळीकर यांनी दिली.
दरम्यान, सदर तिघा व्यक्तींच्या संपर्कात आलेल्या परभणी जिल्ह्यातील जिंतूर, बोरी, सेलू, गंगाखेड आणि दैठणा या ठिकाणच्या 5 व्यक्तींनादेखील संबंधित पोलीस ठाण्यांना आदेश देऊन पोलिसांमार्फत ताब्यात घेऊन त्यांच्या-त्यांच्या घरातच विलगीकरण अर्थात होम-क्वारंटाईन करण्यात आले आहे. त्यांच्याही स्वॅबचे नमुने तपासणीसाठी घेण्यात आले असून त्याचा अहवाल आज रात्री किंवा उद्या सकाळी प्राप्त होईल, अशी माहिती मुगळीकर यांनी दिली आहे.
एकूणच परभणी शहरात तसेच जिल्ह्यात अद्याप एकही कोरोनाग्रस्त रुग्ण आढळला नसला तरी संशयितांची मात्र मोठ्या प्रमाणात तपासणी सुरू आहे. जिल्ह्यातील सुमारे दोन लाखांहून अधिक घरांमध्ये वर्कर्स आणि आरोग्य विभागाच्या कर्मचार्‍यांनी भेट देऊन आरोग्य तपासणी केली आहे. पण, जमातमध्ये सहभागी झालेल्या व्यक्तींमध्ये परभणीचे 3 जण असल्याच्या बातमीने परभणीकरांची चिंता वाढली होती. यावर आरोग्य प्रशासनाने तत्काळ उपायोजना करून पुढील कारवाई केली. यामुळे परभणीकरांनी सुटकेचा निःश्वास सोडला.
परभणीत अद्याप एकही कोरोनाग्रस्त रुग्ण आढळलेला नव्हता. मात्र, दिल्लीच्या कार्यक्रमात जाऊन आलेल्या व्यक्तींमुळे परभणीकरांची चिंता वाढली होती. परंतु, आता त्यांच्या निगेटिव्ह अहवालामुळे दिलासा मिळाला आहे.
