परभणी - गणेशोत्सवाच्या काळात कुठेही घातपात घडू नये, यासाठी जिल्ह्यात दहशतवाद विरोधी पथक (एटीएस) ठिकठिकाणी पाहणी करत आहे. या दरम्यान शनिवारी पुर्णा तालुक्यात डिटोनेटरच्या २० स्फोटक कांड्या सापडल्या आहेत. याप्रकरणी एकाला अटक करण्यात आली असून पुर्णा पोलीस ठाण्यात गुन्हा दाखल करण्यात आला आहे.
हेही वाचा - परभणी गणेश दर्शन खास तुमच्यासाठी; बघा सामाजिक, पर्यावरणीय संदेश देणारे देखावे...
सध्या सर्वत्र गणेशोत्सवाची धामधूम सुरू आहे. अनेक ठिकाणी गर्दी होत असून याचा फायदा घेत काही समाजकंटक लोकांकडून घातपात घडवण्याची शक्यता असते. या पार्श्वभूमीवर परभणी एटीएसने तपासणी मोहीम सुरू केली आहे. यादरम्यान, पूर्णा तालुक्यात एटीएसच्या पथकातील पोलीस उपनिरीक्षक विश्वास खोले, शेख अजहर पटेल, दीपक मुदीराज यांनी पूर्णा ते चुडावा दरम्यान संशयित ट्रॅक्टर (क्र.RJ06C2683) पकडला होता. या ट्रॅक्टरची तपासणी करत असताना लोखंडी बॉक्समध्ये डिटोनेटरच्या स्फोटक जिलेटीन कांड्या आढळून आल्या आहेत.
हेही वाचा - पडघम विधानसभेचे.. परभणीतील चारही मतदारसंघासाठी भाजपकडून 51 इच्छुकांच्या मुलाखती
या प्रकरणी चालक शेख खाजा शेख इसाक (रा.वसमत, जि.हिगोली) याच्यावर पुर्णा पोलीस ठाण्यात गुन्हा दाखल करण्यात आला असून त्याला अटक करण्यात आली आहे. स्फोटक जिलेटिन बाळगल्याप्रकरणी प्रकरणी कलम 345 आणि भा द वि 286 अंतर्गत ही कारवाई करण्यात आली आहे. दरम्यान, एटीएसदेखील या जिलेटिनचा कुठे घातपात घडवण्यासाठी वापर होणार होता का? या दृष्टिकोनातून तपास करत आहे. २० कांड्यांसह ट्रॅक्टर, असा २ लाख ३०० रुपयांचा मुद्देमाल पोलिसांनी जप्त केला आहे.
हेही वाचा - 'चांद्रयान- 2 मोहीम ९५ टक्के यशस्वी', ऑर्बिटर ७ वर्षे करणार चंद्राचा अभ्यास
घरमालक, जागामालकांना पोलिसांचं आवाहन
पोलीस अधीक्षक कृष्णकांत उपाध्याय यांनी जिल्ह्यातील घर मालकांना आपल्या भाडेकरूबाबत संपूर्ण माहिती पोलिसांना कळवण्याचे आवाहन केले आहे. ही माहिती न देणाऱ्या काही घर मालकांवर यापूर्वी गुन्हेदेखील दाखल झाले आहेत. यापुढे असा निष्काळजीपणा करणार्‍या घरमालकांवर कारवाई करण्यात येईल, असा इशारादेखील पोलीस अधीक्षकांनी दिला आहे.
