पालघर - जिल्ह्यातील पालघर-वाडा-देवगाव या रस्त्याचे वाडा शहरात रुंदीकरणाचे काम सूरू आहे. या रस्ता रूंदीकरणाविरोधात वाडा शहरातील व्यापारी असोसिएशनने कडकडीत बंद पाळला आहे. या बंदमध्ये अत्यावश्यक सेवा देणारे दुकाने वगळता इतर सर्व दुकाने बंद ठेवण्यात आली आहेत. हा बंद सोमवारी सकाळी 9 पासून सुरू करण्यात आला आहे. तर, सार्वजनिक बांधकाम विभागाच्या मनमानी कारभाराविरोधात 2 मार्चपासून ते न्याय मिळेपर्यंत हा बंद पुकारण्यात येणार असल्याचे फलकही वाडा शहरात लावण्यात आले आहेत.
जिल्ह्यातील पालघर-वाडा-देवगाव या राज्यमार्गाच्या रुंदीकरणाचे काम सद्या वाड्यात सुरू आहे. हा रस्ता वाडा शहरातून जात असल्याने येथील दुतर्फा असलेल्या व्यापारीवर्गाची दुकाने तुटणार आहेत. काही ठिकाणी गटार बांधणीची कामे चालू आहेत. रस्ता रुंदीकरण साडे दहा मीटरचे असताना या रस्त्याचे 16 मीटर रुंदीकरण करण्यात येणार असल्याच्या नोटीस व्यापाऱ्यांना देण्यात आल्या असल्याचे व्यापारीवर्गाचे म्हणणे आहे.
हेही वाचा - पाकिस्तान पुरस्कृत दहशतवाद नष्ट करण्यासाठीच ३७० हटवले- सुब्रम्हण्यम स्वामी
या विरोधात व्यापारीवर्गाने वाडा बंद हत्यार उपसले आहे. रस्ता रुंदीकरण हे साडे दहा मीटरचे असून तसे टेंडरही आहे. मात्र, सार्वजनीक विभागाने अचानकपणे 16 मीटर रुंदीकरणाची नोटीस दिली असल्याचे व्यापारीवर्गाने सांगितले. त्यामुळे कायदेशीर मार्गाने रस्ता रूंदीकरणाची जागा संपादित करावी असे व्यापारी असोसिएशनचे उपाध्यक्ष संजय शहा यांचे म्हणणे आहे. रस्ता रुंदीकरणाच्या मुद्यावर व्यापारीवर्ग आणि सार्वजनिक बांधकाम विभाग यांच्या विरोधात सद्या हा सामना चांगलाच रंगल्याचे चित्र आहे.
हेही वाचा - एटीएम फोडण्याचे सत्र सुरूच, पालघरमध्ये अॅक्सिस बँकेच्या एटीएमवर चोरट्यांचा डल्ला
