पालघर: जिल्ह्यात सर्वत्र उत्साहात गणरायाचे आगमन

'गणपती बाप्पा मोरया'च्या जयघोषात आज घरोघरी आणि सार्वजनिक मंडळात गणपतीची विधीवत प्रतिष्ठापना करण्यात आली. दरम्यान, भाविकांनी शाळुच्या गणपती मुर्तीला पंसती दिल्याची माहिती आहे.

पालघर - महाराष्ट्राचे आराध्य दैवत, विघ्नहर्त्या गणरायाचे राज्यसह पालघर जिल्ह्यातही मंगलमय वातावरणात आगमन झाले. ‘गणपती बाप्पा मोरया’च्या जयघोषात घरोघरी आणि सार्वजनिक मंडळात गणपतीची विधीवत प्रतिष्ठापना करण्यात आली. लाडक्या गणरायाच्या स्वागतासाठी घरातील आबालवृद्ध आणि मंडळातील कार्यकर्ते गेल्या काही दिवसांपासून तयारीला लागले होते.

रविवारी हरतालिकेनिमित्त अनेक महिलांनी घरोघरी पूजा केली. त्यानंतर आज सोमवारी जयघोषात घरोघरी आणि सार्वजनिक मंडळात गणपतीची विधीवत प्रतिष्ठापना करण्यात आली. दरम्यान, यावर्षी अनेक भाविकांनी शाडूच्या मूर्तीला पसंती दिली असल्याची माहिती विक्रेत्यांनी दिली आहे. थर्माकोलला बंदी असल्यामुळे यंदा मोठ्या प्रमाणावर प्लायवूड, पुठ्ठा, वेलवेट, एलईडी, लेस, अशा आकर्षक सजावटीचे सिंहासन, बैठका, मंदिर-मखरे बाजारात दिसून येत आहेत. या आकर्षक व सुबक मंदिरांची भाविकांनी मोठ्या प्रमाणात खरेदी केली.