पालघर- कोरोनाकाळात अनेक वैद्यकीय अधिकारी कर्मचारी कोणताही सण साजरा न करता अहोरात्र सेवा करत आहेत. दिवाळीत अनेक वरिष्ठ प्रशासकीय अधिकाऱ्यांना कर्मचारी आणि इतरांकडून मिठाई भेट देण्यात येते. परंतु पालघरचे जिल्हाधिकारी डॉ. माणिक गुरसळ यांनी कोविड सेंटरमधील अधिकारी-कर्मचारी व रुग्णांंना मिठाई वाटप करत अनोख्या पद्धतीने दिवाळी साजरी केली.
पालघरचे जिल्हाधिकारी डॉ. माणिक गुरसळ यांनी मिठाई, ड्रायफूट आदीची सर्व पाकीटे घेत विक्रमगड येथील रिव्हेरा कोविड सेंटर गाठले. जिल्ह्यात कोरोनाला आळा घालण्यास मागील सात महिन्यांपासून दिवसरात्र झटत महत्त्वपूर्ण भूमिका बजावणाऱ्या डॉक्टर, आरोग्यसेविका, कर्मचारी तसेच कोरोना बधित रुग्णांची त्यांनी भेट घेतली. जिल्हाधिकाऱ्यांनी अचानक भेट दिल्याने पुरेश्या तयारीत नसलेली सर्व यंत्रणा काहीशी गडबडली. मात्र, कोविड सेंटरमधील अधिकारी-कर्मचाऱ्यांना एकत्र बोलवत आपुलकीने त्यांची विचारपूस केली आणि आपल्या गाडीत ठेवलेले सर्व मिठाईचे बॉक्स त्यांच्या पुढे ठेवले. हे सर्व मिठाई, ड्रायफ्रूट वाटप करत अनोख्या पद्धतीने दिवाळी साजरी केली. त्यामुळे या सर्व कोरोनायोद्ध्यांना आश्चर्याचा धक्का बसला.
गेल्या सात महिन्यांपासून झटत आहेत कोविड योद्धा-
कोरोनाचा संसर्ग रोखण्यासाठी आणि संसर्ग झालेल्या बाधित रुग्णांवर उपचार करण्यासाठी जिल्ह्यात कोविड केअर सेंटर, डेडिकेटेड कोविड हेल्थ सेंटर, डेडिकेटेड कोविड हॉस्पिटल अशी व्यवस्था निर्माण करण्यात आली. पालघर तालुक्यात सहा, डहाणू तालुक्यात पाच, तलासरी दोन, विक्रमगड पाच, जव्हार पाच, मोखाडा दोन आणि वाडा दोन अश्या एकूण अठ्ठावीस केंद्रात रुग्णांची तपासणी, विलगिकरण आणि बाधित रुग्णांवर उपचार करण्यासाठी तज्ञ वैद्यकीय अधिकाऱ्याच्या देखरेखीखाली मोठी आरोग्य यंत्रणा उभारण्यात आली. मागील सात महिन्यांपासून ही आरोग्य यंत्रणा आपल्या जीवाची तमा न बाळगता आपल्या कुटुंबियांपासून दूर राहून कोरोना रुग्णांचे जीव वाचविण्यासाठी अहोरात्र झटत आहेत. देशात प्रत्येक घरात दिवाळी साजरी केली जात असताना आजही अनेक डॉक्टर्स, नर्स, आरोग्य सेवक बाधित रुग्णांवर उपचार करण्यासाठी झटत आहेत.
