नाशिक - शिवसेना आणि भाजप युतीची चर्चा सुरू असताना, नाशिकमध्ये शिवसेना पदाधिकाऱ्यांनी आगामी विधानसभा निवडणुका स्वबळावर लढण्याची तयारी सुरू केली आहे. आज (रविवार) शिवसेना पदाधिकाऱ्यांनी भाजप पदाधिकाऱ्यांना डावलून आपल्या कार्यकर्त्यांच्या हातात शिवबंधन बांधले. आजपासून शिवसेनेने पश्चिम मतदार संघात प्रचाराचे रणशिंग फुंकले आहे. विशेष म्हणजे प्रचाराची सुरुवातच मिसळ पार्टीने केल्याने एकच चर्चा रंगली आहे.
मिसळ गरम आहे, चेहरे मात्र नरम आहेत, भाऊ रस्सा थोडा कमीच वाढ युतीच वातावरण गरम आहे, अशी चर्चा मिसळ पार्टीत रंगली होती. भाजप शिवसेनेत अजूनही जागा वाटपावरून धुसफूस सुरू आहे. त्यामुळे शिवसेना आणि भाजप युती होणार का नाही याची जोरदार चर्चा सुरू आहे. पश्चिम मतदार संघ भाजपच्या वाट्यावर असला तरी शिवसेना त्यावर दावा करत आहे. मागील निवडणुकांमध्ये आम्ही गाफील राहिलो, मात्र आता तसे काहीही होणार नाही. आम्ही स्वबळावर लढण्यास तयार आहोत शिवसेना नगरसेवक सुदाम ढोमसे यानी स्पष्ट केले आहे.
हेही वाचा - शरद पवार सोमवारी नाशिक दौऱ्यावर; विधानसभानिहाय बैठकीचे आयोजन
नाशिकमधील शिवसेना पदाधिकाऱ्यांनी स्वबळावर लढण्याची तयारी केली आहे. त्याची सुरुवात म्हणून जुन्या शिवसैनिकांना एकत्र आणत मिसळ पार्टीचे आयोजन करण्यात आले होते. या पार्टीला कार्यकर्त्यांनी मोठ्या संख्यने हजेरी लावली होती. दरम्यान, आगामी निवडणुकीत नाशिकमध्ये जागा वाटपावरून सुरू असलेला गोंधळ दोन्ही पक्ष याग्य प्रकारे हाताळतात की, दोन्ही पक्षांमध्ये सुरू असलेला अंतर्गत वाद पुन्हा चव्हाट्यावर येतो हे बघणे महत्वाचे ठरणार आहे.
