नाशिक - जिल्ह्यात कोरोनाचा प्रादुर्भाव झपाट्याने वाढत असून प्रशासनाने गर्दी टाळण्यासाठी कडक निर्बंध घातले आहेत. बारा ज्योतिर्लिंगांपैकी एक असलेल्या श्री त्र्यंबकेश्वर महादेव मंदिरात महाशिवरात्री निमित्ताने होणारी गर्दी लक्षात घेता मंदिर 10 ते 14 मार्चपर्यंत बंद ठरवण्याचे आदेश दिले आहेत. दरवर्षी महाशिवरात्री निमित्त देशभरातून लाखो भाविक त्र्यंबकेश्वरला महादेव मंदिरात येत असतात मात्र गेल्या आठ दिवसापासून नाशिक जिल्ह्यात पुन्हा कोरोनाचा प्रादुर्भाव वाढत असल्याने गर्दी टाळण्यासाठी भाविकांसाठी मंदिर बंद ठेवण्याचा निर्णय घेतला. मात्र, असे असले तरी मंदिराला आकर्षक म्युझिकल विद्युत रोषणाई करण्यात आल्याने मंदिर उजळून निघाले आहे.
त्र्यंबकेश्वर शहरात 144 कलम लागू -
महाशिवरात्रीच्या दिवशी निघणारी पालखी ही कोठेही न थांबता थेट शिवमंदिरात म्हणजे त्र्यंबकेश्वर मंदिरात जाईल आणि विधिवत पूजाअर्चना केली जाईल, असाही निर्णय घेण्यात आला आहे. नागरिकांनी सहकार्य करावे आणि कोरोना विषाणूचा प्रादुर्भाव थांबविण्यासाठी मदत करावी, असे आवाहन प्रशासन अधिकाऱ्यांनी केले आहे. महाशिवरात्रीला त्र्यंबकराजांची मोजक्या पुजाऱ्यांच्या उपस्थितीत विधिवत पूजा केली जाईल. दरवर्षी हजारो भाविक महाशिवरात्रीला त्र्यंबकेश्वर येथे भगवान त्र्यंबकेराज्याच्या दर्शनासाठी येत असतात. त्यामुळे यंदा ही गर्दी होऊ नये, कोरोनाचे सर्व नियम पाळले जावेत, त्याकरिता पोलीस प्रशासनाने देखील 10 ते 14 मार्च दरम्यान त्र्यंबकेश्वर शहरात 144 कलम लागू करून जमावबंदीचे आदेश दिले आहेत.
त्र्यंबकेश्वरचे महात्म्य -
नाशिक शहरापासून 35 किलोमीटर अंतरावर बारा ज्योतिर्लिंगांपैकी एक त्र्यंबकेश्वर महादेवाचे प्राचीन मंदिर आहे. हे ज्योतिर्लिंग गोदावरी नदीजवळ महाराष्ट्रातील नाशिकमध्ये आहे. या ज्योतिर्लिंगाचे वैशिष्ट्य म्हणजे शिवलिंगास ब्रम्हा, विष्णू, महेश ह्या तिघांच्या प्रतिमा आहेत. मंदिराचे बांधकाम 1755 ते 1786 साली नानासाहेब पेशवे यांनी केल्याचा उल्लेख आढळतो. या ज्योतिर्लिंगाजवळ ब्रम्हगिरी नावाचा पर्वत असून या पर्वतावरूनच गोदावरी नदीचा उगम झाला आहे. तर भगवान शिवाचे त्र्यंबकेश्वर महादेव हे मंदिर ही आहे. दर बारा वर्षाने नाशिकसोबत त्र्यंबकेश्वरमध्ये सिंहस्थ कुंभमेळा भरतो. हिंदू धर्मातील वैष्णवांमध्ये दिगंबर अनी, निर्वाणी अनी आणि निर्मोही अनी असे तीन आखाडे सर्वोच्च स्थानी आहेत. याच तीन आखाड्यांच्या नेतृत्वाखाली दर बारा वर्षांनी सिंहस्थ कुंभमेळा भरतो. शैवांचे आखाडेही त्र्यंबकेश्वरात जमतात. येथे निवृत्तिनाथ महाराज समाधी मंदिर देखील आल्याने त्र्यंबकेश्वरला विशेष महत्व आहे. वर्षभर देशाच्या कानाकोपऱ्यातून भाविक येत असतात. तसेच नारायण नागबली सारखा धार्मिक विधी देखील ह्याच ठिकाणी केला. तर तो विधी सार्थ होतो, अशी मान्यता आहे.
हेही वाचा - LIVE UDATE : महाशिवरात्रीच्या पर्वावर देशभरातील घडामोडी वाचा एका क्लिकवर
