नाशिक - कोरोनामुळे अनेकांचे व्यवसाय बंद पडले. अनेकजण बेरोजगार झाले. त्यामुळे अनेकांसमोर उदरर्निवाहाचा प्रश्न उभा ठाकला. अनेक ठिकाणी ऑटो चालकांनी ऑटो चालविणे बंद करून पंक्चरचे दुकान लावले. तर शहरातून बेरोजगार होऊन आलेल्या तरुणांनी कुठे चहाचे तर, कुठे नाश्त्याचे दुकान थाटले. अशाच एका फोटोग्राफरचा व्यवसाय बंद झाल्याने तो शेतीकडे वळला आणि त्याने यांत्रिक पद्धतीने कांदा लागवड केली. येवला तालुक्यातील एरंडगाव येथील तुकाराम मढवई असे या फोटोग्राफरचे नाव आहे.
टाळेबंदीचा फटका...
कोरोनाचा प्रादुर्भाव वाढल्याने देशभरात लॉकडाऊन करण्यात आले. अनेक सण-समारंभ पुढे ढकलण्यात आले. लवकर परिस्थितीत सुधारणा होईल, असे अनेकांना वाटत होते. मात्र त्यांच्या आशेवर पाणी फिरले. उन्हाळ्यात लग्नांचा धुमधडाका असतो. यामध्ये फोटोग्राफरचा चांगला व्यवसाय होत असतो. टाळेबंदीमुळे यंदा लग्नसराई होऊ शकली नाही. शिवाय नंतरच्या काळात काही बंधने टाकून लग्नाला मान्यता देण्यात आली. त्यामुळे अनेकांनी कोणताही खर्च न करता मोजक्या पद्धतीने कार्यक्रम पार पडले. त्यामुळे या काळातही फोटोग्राफरचा व्यवसाय ठप्पच राहिला. तुकाराम मढवई यांचा देखील व्यवसाय बंद असल्याने, पुढे काय करायचा हा प्रश्न होता. त्यामुळे त्यांनी शेती व्यवसायाकडे वळण्याचा निर्णय घेतला.
पारंपरिक पद्धतीला बाय-बाय..
पावसामुळे कांदा रोपे सडून खराब होतात. त्यामुळे पुढील काळात कांदा लागवड करण्यासाठी शेतकऱ्यांजवळ रोप शिल्लक राहत नाही. त्यामुळे यंत्रामध्ये बी टाकून यंत्राच्या साह्याने कांदा पेरणी केली जात आहे. कांदा लागवड करण्यासाठी कांदा रोप तयार करणे, रोप आल्यानंतर कांदा लागवड करण्यासाठी मजूर बघणे, मजुरांचा खर्च आणि लागवडीसाठी लागणारा वेळ हा शेतकऱ्यांना परवडत नाही. त्यामुळे आता शेतकऱ्यांनी नवीन पद्धतीने कांदा पेरणी करावी, अशी कल्पना फोटोग्राफरला सुचली आणि आधुनिक तंत्रज्ञानाचा उपयोग करून यंत्राद्वारे कांदा पेरणी केली. पारंपरिक कांदा लागवडीला बाय-बाय करत नवीन पद्धतीने यंत्राद्वारे कांदा पेरणी करून देत शेती व्यवसायाकडे हा फोटोग्राफर वळला आहे. कांदा पेरणीद्वारे मजुरांचीही गरज पडत नसून कमी वेळात जास्त क्षेत्रामध्ये पेरणी केली जाते. शिवाय खर्च व वेळही कमी लागत आहे. फोटोग्राफी व्यवसायाकडून शेती व्यवसायाकडे वळत, यंत्राद्वारे कांदा पेरणी करून आपल्या परिवाराचा गाडा हा फोटोग्राफर चालवत आहेत.
हेही वाचा -शेतकऱ्यांची दिवाळी मदतीविनाच जाणार; प्रशासकीय गोंधळ अन् आचारसंहितेची आडकाठी
