नाशिक - येवला कातरणी ग्रामपंचायतीच्या सार्वत्रिक निवडणुकीत सदस्यपदांचा जाहीर लिलाव झाल्याबाबतचे पुरावे प्राप्त झाले. त्यामुळे या ग्रामपंचायतीची आतापर्यंत राबवण्यात आलेली संपूर्ण निवडणूक प्रक्रिया रद करण्यात आली, अशी घोषणा राज्य निवडणूक आयोगाने केली आहे.
सदस्यपदांचा जाहीर लिलाव
कातरणी ग्रामपंचायतीच्या सार्वत्रिक निवडणुकीत सदस्यपदांचा जाहीर लिलाव झाल्याबाबत राज्य निवडणूक आयोगाकडे तक्रार प्राप्त झाली होती. या ग्रामपंचायतीच्या सदस्यपदांच्या 11 जागांसाठी आयोगाने निवडणूक कार्यक्रम जाहीर केला होता. त्यानुसार 15 जानेवारी 2021 रोजी मतदान नियोजित होते. मात्र प्राप्त तक्रारीवरून सर्व 11 जागांवर लिलावाच्या माध्यमातून सकृतदर्शनी उमेदवार बिनविरोध निवडून येताना दिसत होते. त्यामुळे आयोगाने हे निकाल घोषित करण्यास मनाई केली होती.
लिलावचे ऑडिओ किल्प
लिलावाच्या तक्रारीची दखल घेऊन आयोगाने नाशिकच्या जिल्हाधिकारी तसेच जिल्हा पोलीस अधीक्षक, मनमाडचे उपविभागीय पोलीस अधिकारी यांचे अहवाल तसेच विविध कागदपत्रे आणि मोबाईलवरील अडिओ क्लिपचे संभाषणाचे आयोगाने अवलोकन केले. त्यात तथ्य आढळल्यामुळे कातरणी गावाची निवडणूक प्रक्रिया रद्द करण्याचा निर्णय निवडणूक आयोगाने घेतला.
कायदेशीर कारवाईचे आदेश
आता अधिक तपास करून भारतीय दंड विधानाचे प्रकरण 9-अ नुसार अथवा अन्य कायद्यांतील तरतुदींनुसार संबंधितांविरूद्ध कायदेशीर कारवाई करून आयोगास अहवाल सादर करावा, असे निर्देश राज्य निवडणूक आयोगाने नाशिकचे जिल्हाधिकारी व पोलीस अधीक्षकांना दिले आहे.
हेही वाचा - लिलावप्रकरणी कातरणी ग्रामपंचायत निवडणूक रद्द
