नाशिक - दिंडोरी तालुक्यात नैसर्गिक आपत्तीने नुकसान झालेले शेतकरी अद्यापही सरकारी मदतीपासून वंचित असल्याचे दिसत आहे. शासनाकडून अनुदान स्वरूपात देण्यात येणाऱ्या रक्कमेचे वाटप, दिंडोरी तहसील कार्यालयाच्या ढिसाळ कारभारामुळे होत नसल्याने शेतकरी मदतीपासून वंचित आहेत. मात्र, काही ठिकाणी अनेक बागायतदार शेतकऱ्यांना दोन वेळा अनुदान वाटप झाल्याने, कोणत्याही स्वरूपातील अनुदान न मिळालेल्या शेतकरी वर्गात प्रचंड नाराजी आहे.
हेही वाचा... कडकनाथ घोटाळा : 'कुटुंबाच्या सहभागाचे पुरावे द्या, राजकारणातून संन्यास घेईन'
अवकाळी पावसामुळे दिंडोरी तालुक्यातील 30,498 शेतकरी बाधित झाले. त्यापैकी 28,808 शेतकऱ्यांना 31 कोटी 4 लाख 22 हजार 971 रुपयाचे अनुदान वाटप करण्यात आले असल्याची माहिती तहसील कार्यालयातून देण्यात आली. यात फळपीकास हेक्टरी 18 हजार तर इतर पिकांना हेक्टरी 8 हजार, असा साधारण वाटपाचा निकष होता. अनुदान वाटप दोन हेक्टरच्या आतील शेतकऱ्यांसाठी करण्यात आले. अनुदान प्राप्त करण्यासाठी शेतकऱ्यांना अगोदर तलाठ्यांनीच मोठ्या प्रमाणात अडवणूक केल्याचे शेतकरी सांगत आहेत.
हेही वाचा... अवैध दारू विक्री विरोधात रणरागिणींचा एल्गार; महिलांनी पेटवली 3 दुकाने
अशा अनेक समस्या सोडवत लवकर मदत पदरात पडेल, या आशेवर असणाऱ्या शेतकऱ्यांचे बँकेतील खाते क्रमांक महसूलकडून चुकीचे टाकण्यात आले. त्यामुळे असंख्य शेतकऱ्यांचे पैसे बँक खात्यात जमा झालेले नाही. त्यात काही शेतकऱ्यांना मात्र दोनदा अनुदानाची रक्कम खात्यावर महसूल विभागाकडून वर्ग करण्यात आली आहे. तेव्हा प्रशासनाच्या या निष्काळजीपणामुळे अनेक शेतकऱ्यांना अनुदानापासून वंचित राहावे लागले आहे.
हेही वाचा... नरेंद्र मोदी घेणार ‘प्रधानमंत्री राष्ट्रीय पुरस्कार’ २०२० च्या विजेत्या मुलांची भेट
त्यातही आता दोन वेळा रक्कम जमा झालेली खाती तहसील कार्यालयाच्या आदेशामुळे तात्पुरत्या व्यवहारांसाठी बंद करण्यात आली आहेत. तेव्हा त्या शेतकऱ्यांनाही स्वतःचे पैसे बँकेतून काढता येत नाही. एकूणच 'चूक महसुलाची शिक्षा मात्र शेतकऱ्यांना' असा कारभार सध्या दिंडोरी तहसीलमध्ये सुरू असल्याचे पहायला मिळत आहे.
