नाशिक - शहरात गेल्या महिन्याभरापासून गुंडांनी उच्छाद मांडला आहे. धार्मिक, आध्यत्मिक आणि संस्कृतिक वारसा असलेले नाशिक गुन्हेगारांचा अड्डा बनले आहे. त्यामुळे नाशिककरांचा खाकी वर्दीवरील विश्वास उडाला आहे. मागील काही दिवसांत चोऱ्या, घरफोड्या, दरोडे, हत्या ह्यामुळे नाशिक हादरले आहे.
शुक्रवारी दिवसाढवळ्या शहरातील सीटी सेंटर मॉल जवळील मुथ्थुट फायनान्सच्या कार्यालयावर दरोडेखोरांनी बेछूट गोळीबार केला. ह्या घटनेत एक कर्मचारी ठार झाला असून ३ जण जखमी झाले. ह्या घटनेने नाशिक मध्ये कायदा सुव्यवस्था उरली नाही, अशी भावना नाशिककरांच्या मनात निर्माण झाली आहे.
या घटनेला काही तास उलटत नाही तोच म्हसरूळ भागात समाजकंटकांनी दहशत निर्माण करण्यासाठी परिसरातील चार ते पाच वाहनांची तोडफोड केली. आठ दिवसांपूर्वी भांडण सोडविण्यास गेलेल्या एका पोलीस कर्मचाऱ्याला गुंडांनी काठ्यांनी बेदम मारहाण करत जखमी केले. ज्या शहरात पोलिसच सुरक्षित नाहीत तिथे सर्वसामान्य नागरिकांचे काय? असा प्रश्न नागरिक विचारत आहेत.
विश्वास नांगरे पाटील यांची नाशिकचे पोलीस आयुक्त म्हणून नियुक्ती झाल्यानंतर गुन्हेगारीला आळा बसेल, अशी आशा नागरिकांमध्ये निर्माण झाली होती. नाशिककरांनी आयुक्तांचे जोरदार स्वागतही केले होते. मात्र, काही दिवसांतच शहरातील गुन्हेगारीने डोके वर काढल्याने त्यांच्या कार्यक्षमतेवर नागरिक प्रश्न चिन्ह उपस्थीत करत आहेत. वाढत्या गुन्हेगारीबाबत मुख्यमंत्र्यांची भेट घेणार असल्याचे भाजप आमदार सीमा हिरे यांनी सांगितले आहे.
हेल्मेटसक्ती कारवाईसाठी रस्त्यावर शेकडो पोलीस कामाला लावण्यापेक्षा गुन्हेगारी कशी कमी होईल ह्याकडे आयुक्तांनी लक्ष दयावे. तसेच नाशिक दत्तक घेतलेल्या मुख्यमंत्र्यांनी नाशिकला वाऱ्यावर सोडू नये, अशा प्रतिक्रिया नागरिक व्यक्त करत आहेत.
