नाशिक - कोरोनाच्या पार्श्वभूमीवर करण्यात आलेल्या लॉकडाऊनचा फटका सर्व क्षेत्राला बसला असून, तो नाशिक महानगरपालिकेच्या कर विभागाला देखील बसला आहे. लॉकडाऊन काळात सर्वच व्यवसाय बंद असल्याने अनेकांना उदरनिर्वाह कसा करावा? असा प्रश्न पडला होता. त्याचा परिणाम पालिकेच्या करवसुलीवर झाला आहे. गेल्या वर्षीपेक्षा जून महिन्यात घरपट्टी वसुलीत 13 कोटींची तूट निर्माण झाली आहे. त्यामुळे याचा परिणाम भविष्यात पालिकेच्या आस्थापना खर्च तसेच विकास कामांवर देखील होऊ शकतो.
कोरोनाचा प्रादुर्भाव होऊ नये म्हणून सरकारने तीन महिने लॉकडाऊन जाहीर केला. या काळात सर्वच व्यवसाय ठप्प झाले होते. तसेच राज्याच्या प्रशासकीय यंत्रणासोबत नाशिक महानगरपालिका यंत्रणेनेसुद्धा कोरोना प्रादुर्भाव कसा कमी करता येईल. कोरोनाबाधित रुग्णांवर योग्य उपचार कसे होतील? यावर लक्ष केंद्रीत केले आहे. पालिकेची 60 टक्के प्रशासकीय यंत्रांणा आजच्या घडीला अत्यावश्यक सेवा देण्यात व्यस्त आहे. त्यामुळे करवसुलीवर याचा परिणाम दिसून येत आहे.
शहरातील अर्थचक्र थांबल्याने सक्तीची करवसुली नाही -
नाशिक पालिकेला घरपट्टी, पाणीपट्टी आणि जीएसटीच्या कर माध्यमातून उत्त्पन्न मिळत असते. मिळणारे पैसे महानगरपालिकेचा आस्थापना खर्च तसेच शहरातील विकास कामांसाठी वापरला जात आहे. मात्र, लॉकडाऊन काळात शहरातील अर्थचक्र थांबल्याने तसेच हाताला काम नसल्याने अनेकांना आर्थिक संकटाचा सामना करावा लागत आहे. म्हणून मार्च, एप्रिल, मे, जून महिन्यात होणाऱ्या करवसुलीमध्ये मागील वर्षीपेक्षा मोठी तूट निर्माण झाली आहे. शहरातील नागरिकांच्या आर्थिक परिस्थितीचा विचार करता तसेच कोरोनाचा प्रादुर्भाव कमी करण्यात व्यस्त असलेल्या पालिकेने सक्तीचे पाऊल उचलले नाही.
सर्वच विकास कामे ठप्प आहेत. राज्य शासनाने तसे निर्देश दिले आहेत. चार महिन्यांपासून लोक घरात बसून आहेत. सर्वाधिक अडचणीत सापडला तो मध्यमवर्गीय नागरिक. त्याचे दुकाने बंद होते, व्यावसाय बंद होते. त्यामुळे घरपट्टी देण्यासाठी सुद्धा त्यांच्याकडे पैस नाहीत. अनलॉक सुरू असला तरी दुकानात ग्राहक नाहीत. अर्थचक्र अजून सुरळीत झाले नाही. त्यामुळे नागरिक घरपट्टी आणि पाणीपट्टी महानगरपालिकेत जमा करत नाही. त्यामुळे विकास कामांवर परिणाम होतो. यातून नागरिकांना सवलत दिली पाहिजे. टप्प्याटप्प्याने नागरिक पैसे जमा करतील. मात्र, तातडीने कर भरण्यासाठी त्यांना अडचणी येत आहे. याचा महानगरपालिकेने विचार करावा.
कर वसुली तुलना 2019-20 :
घरपट्टी जून 2019 - 26 कोटी 52 लाख रुपये
2020 - 12 कोटी 99 लाख रुपये
पाणीपट्टी 2019 - 2 कोटी 55 लाख रुपये
2020 -1 कोटी 45 लाख रुपये
जीएसटी 2019 -78 कोटी 66 लाख रुपये
2020 - 85 कोटी 93 लाख रुपये
